Read Ngaju PANGABAR 7 Bible Online

PANGABAR 7 - Ngaju bible

PANGABAR 7

¹ Aran bahalap labih bahalap bara minyak je larang regae; tuntang andau pampatei labih bahalap bara andau inakan.

²Labih bahalap haguet akan human oloh matei bara akan eka pesta. Awi itah patut harajur mangenang tahiu pampatei je mentai genep biti.

³Kapehen atei labih bahalap bara tatawe. Aloh ampin bau rangu-rangut asal atei salawah.

⁴Oloh humong harajur manggoang kasanang; oloh harati harajur manirok pampatei.

⁵Labih bahalap impuji awi oloh harati, bara inara awi oloh je bahalali maharati.

⁶Tatawen oloh humong jaton rimae, kilau auh duhi kinan apui.

⁷Amon oloh pintar manipu, jete gawin kahumonge, amon olohmanarima duit suap, maka tirok ateie rusak.

⁸Labih bahalap kahapus ije pakarabara tamparae; labih bahalapkasabar bara lalau tama-tamam.

⁹ Ela kaje-kajeng sangit; bayaoloh humong je mingkes kasingi.

¹⁰Ela misek, “Mbuhen jaman helo labih bahalap bara jaman jetoh?” Baya oloh bureng je misek kalote.

¹¹Oloh belom patut pintar harati; regan pangatawan tahiu kapintar kaharati sama dengan warisan;

¹²sama kea dengan duit panyalawah atei. Mahin tinai pangatawan tahiu kapintar kaharati! Eweh tempon jete akan salamat.

¹³Ite gawin Hatalla. Eweh tau mambujur taloh je imingkok Hatalla?

¹⁴Jadi, keleh hanjak amon ikau batuah. Tapi amon ikau buah calaka, ela kalapean je Hatalla manenga kadaduee. Itah dia katawan narai je manjadi limbah te.

¹⁵Pambelomku jaton gunae, tapi katahin pambelomku te gitangku je taloh awang toh: Aton katikae oloh bahalap binasa, aloh ie barasih. Aton katikae oloh je papa panjang umure aloh ie harajur badosa.

¹⁶Ela ah lalau bahalap tuntang ela kea lalau harati. Akan en mampatei arep?

¹⁷Ela kea lalau papa atawa lalau bureng. Akan en matei helo bara katikae?

¹⁸Keleh hakan kadadue te amon itah mikeh Hatalla, tantu itah dinon hasil.

¹⁹Kapintar kaharati mawi oloh je tempon jete labih menteng bara sapuluh oloh je kuasa hong ije lewu.

²⁰Hong kalunen toh jaton aton oloh je dia bara katapas; jaton ije je harajur mawi kahalap tuntang dia puji badosa.

²¹Ela rajin mahining kare pander, eweh tawae ikau kanjeran inyapa awi ije pelayan.

²²Ikau kabuat kea kasene oloh beken je puji inyapam.

²³Urase te iujiku hapan kapintar kaharatingku. Tapi sasar aku manggau pangatawan tahiu kapintar kaharati te, sasar kejau ie bara aku.

²⁴Eweh tau dinon riman pambelom toh? Lalau handalem uka olih iharati.

²⁵Tapi aku baketep bajar tuntang manggau pangatawan, uka mandino kapintar kaharati tuntang auh tombah akan kare paisek. Aku mancoba mangasene je dosa te kahumong, tuntang je kapapa jete kagila.

²⁶Aku manyondau je oloh bawi te labih bapait bara pampatei. Sintan oloh bawi kilau jala tuntang jarat je sadia handak manawan taloh pateie. Paloke kilau pasong je siteng. Oloh je malalus kahandak Hatalla lapas bara jarate, tapi oloh badosa musti inawae.

²⁷Ite, koan Pangomang: Urase taloh te dinongku, metoh mije-mije inggauku panombahe.

²⁸Magon kea aku manggau kare panombah beken, tapi dia aton hasile. Marak sakoyan biti oloh, aku sondau ije biti oloh hatue je ihormatku. Tapi bara marak ewen jaton aton oloh bawi je tau iregaku.

²⁹Baya jetoh je sondauku: Hatalla mawi itah naniha tuntang kilau biasa ih. Tapi itah kabuat ih je mawi arep itah nyanyau tuntang bilit-bilita.