Read Ngaju PANGABAR 8 Bible Online

PANGABAR 8 - Ngaju bible

PANGABAR 8

¹Lalehan kasanang oloh je pintar harati. Ie katawan panombah akan taloh samandiai. Pangatawan tahiu kapintar kaharati mawi ie ngumi-ngumi hanjak, sampai ampin baue harajur barasih.

²Keleh manumon auh raja marentah, tuntang ela mawi janji kajeng-kiso dengan Hatalla.

³Raja tau bagawi sakahandake, amon ie dia ingilak labih bahalap ngejau arep bara ie.

⁴Raja bagawi hapan pangaruhe; jaton je bahanyi malawan auhe!

⁵Oloh je baketep dengae akan belom mangat dia inderoh; oloh pintar harati katawan hamparea tuntang kilen ampie manumon auh raja.

⁶Akan taloh samandiai aton katikae tuntang carae kabuat, tapi isut toto je olih itah haratie!

⁷Jaton je katawan kajarian pambelom narai je mentai, tuntang jaton je tau mansanan narai je akan manjadi.

⁸Jaton je tau manahan tuntang marandar pampateie. Jete taloh je inggoang je dia tau ihakan awie, ie dia olih liwus bara jete, aloh hapan akal je bakalilit.

⁹Urase taloh toh gitangku katika aku manantuani kare taloh je manjadi hong kalunen. Aton katika olon mahapan kuasae uka mambinasa sama arepe.

¹⁰Puji gitangku oloh papa matei tuntang ingubur. Tapi katika kare oloh buli mangubure, ewen manara ie intu lewu ekae malalus taloh papa. Jadi, jete kea hayang.

¹¹Mbuhen kalote kamangate oloh malalus kapapa? Awi hukum dia bajeleng inenga.

¹²Aloh saratus kapapa awi ije biti oloh badosa, ie tetep belom panjang umure haream. Eweh manumon auh Hatalla, musti pambelome uras mangat.

¹³Kabalikae oloh je papa mandino are kasusah. Pambelome golong mahalau sama kilau kangkalingen. Ie kareh matei katika umure magon tabela awi dia manumon TUHAN.

¹⁴Tapi urase te pander ngahus bewei. Ite wei narai je manjadi hong kalunen. Aton oloh bujur je ihukum kilau oloh darhaka, aton oloh papa je imaleh kilau oloh bujur. Jadi, jete kea hayang.

¹⁵Kasimpulan ayungku iete oloh keleh hanjak. Awi hong pambelome intu kalunen jaton kasanang akae beken bara kuman, mihop tuntang hanja-hanjak. Baya jete ih je tau ingkeme intu marak kahekae, katahin pambelom je inenga Hatalla akae.

¹⁶Katika aku nguan gawi handak mandino pangatawan tahiu kapintar tuntang kaharati tuntang aku manantuani kare kajadian hong kalunen toh, palus haratingku aloh itah heka-heka handau hamalem dia hakalayan,

¹⁷itah dia olih harati gawin Hatalla. Aloh kilen ampin itah bagawi, dia baka itah haratie. Oloh pintar harati mangaku ie katawan, tapi sapunae ie dia katawan.