Read Ngaju NYANYIN KARE NYANYI 1 Bible Online

NYANYIN KARE NYANYI 1 - Ngaju bible

NYANYIN KARE NYANYI 1

¹ Nyanyin kare Nyanyi je ingarang Salomo.

²Keleh manyium aku hapan biwihm; sintam labih mangat bara anggor!

³Ikau paham mangat ewaum, aram kilau minyak je mangat ewau, je batusoh awi te kare oloh bawi bujang sinta dengam!

⁴Keleh itah bajeleng, o rajangku, imbit aku akan huang kamarm. Tagal ikau ikei uras hanjak rantang, tuntang manara sintam malabien bara anggor; patut bewei kare oloh bawi bujang sinta dengam!

⁵Aloh babilem, aku bahalap, o kare bawin Yerusalem; babilem sama kilau kare kemah Kedar, tapi bahalap sama kilau dinding benang intu istana Salomo!

⁶Ela mite pupusku je babilem, awi aku buah kekei matanandau. Kare kakaku je hatue sangit dengangku tuntang manyoho aku bagawi hong kabon anggor; aku jaton katika maharago arepku kabuat.

⁷Keleh suman, o je eka sintangku, hong kueh ikau manyakatik kare tabiri, hong kueh ikau mampeter ewen katika halemei? Dia badai aku kareh sama kilau tamuei marak kare tabiri ayun kare kawalm?

⁸Dia badai ikau dia katawan ekae, o je bungas bara marak oloh bawi? Nuntut ih awan pain kawan tabiri, tuntang keleh manyakatik kare kambing aim tokep kemah kare sakatik.

⁹Je inyintaku, ikau sama kilau kuda bawi je manjijit kareta ain raja Misir.

¹⁰Pipim bahalap intu bentok hiasan uyatm bahalap hasaling mutiara.

¹¹Ikei manampa akam hiasan amas, dengan kare manas perak.

¹²Metoh rajangku hunjun ekae menter, nampaur ewau nardus ayungku.

¹³Je eka sintangku ewaue mangat sama kilau mur, metoh menter hunjun usukku.

¹⁴Je eka sintangku sama kilau tampong kambang Kiprus intu kabon anggor En-Gedi.

¹⁵Ikau bahalap toto, manisku, ikau toto bahalap! Matam sama kilau burong dara.

¹⁶Ikau bakena sayang, paham kakenam! Eka itah menter intu oru bahijau.

¹⁷Kayu seder jadi jihin human itah, tuntang papan lotenge bara kayu alau.