Read Ngaju NYANYIN KARE NYANYI 2 Bible Online

NYANYIN KARE NYANYI 2 - Ngaju bible

NYANYIN KARE NYANYI 2

¹Aku baya kambang mawar bara Saron, kambang bakung intu kare janah.

²Sama kilau kambang bakung intu bentok rowut haduhi, tumon te je eka sintangku marak kare oloh bawi.

³Kilau batang apel hong bentok kare batang kayu intu himba, tumon te je eka sintangku marak kare oloh hatue. Aku rajin manganjungen intu pendae, kare buae manis angate.

⁴Imbite aku akan eka pesta, tampayah matae dengangku kontep sinta.

⁵Paabas aku hapan taloh manis bara bua anggor, pamangat aku hapan bua apel, awi aku haban tagal sinta.

⁶Lengee hila sambil penda takolokku, lengee gantau mamalok aku.

⁷Keleh manyanyi, o kare bawin Yerusalem, tagal kare bajang tuntang karahau intu padang, je keton dia akan manderoh sinta, sampai jete imeda.

⁸Hining! Je eka sintangku dumah! Ie sama kilau anak bajang tuntang karahau. Kajo-kajok intu kare bukit gantong, kajo-kajok intu kare lungkoh. Item, intu silan dinding ie mendeng, dengan matae je manggau; manampayah bara karambang baun sengok.

¹⁰Hining, je eka sintangku bapander dengangku. Keleh dumah manisku, kantoh bungasku!

¹¹Item, wayah sadingen jari mahalau, wayah pangujan jari lepah.

¹²Intu tana kare kambang burai; wayah manyempong jari sampai; auh burong kuku tarahining intu petak itah.

¹³Batang sikon nampara mamua, batang anggor nampaur ewau kambange. Kantoh manisku, talih aku bungasku.

¹⁴O burong dara ayungku intu helat kare batu, intu eka manyahokan hong benteng bukit je maniwing, nauhe aku mananture baum, tuntang mahining auhm, awi baum bahalap, auhm mangat.

¹⁵Nawan kare palanduk te, palanduk je korik marusak kabon anggor, awi kabon anggor ikei metohe mangambang

¹⁶Je eka sintangku jete ayungku, tuntang aku ayue, ie manyakatik kare tabirie, marak kare kambang bakung.

¹⁷Sampai hakius riwut hanjewu je maharak kakaput alem. Keleh haluli je eka sintangku, sama kilau karahau, sama kilau anak bajang intu kare bukit gantong Beter.