Read Ngaju NYANYIN KARE NYANYI 3 Bible Online

NYANYIN KARE NYANYI 3 - Ngaju bible

NYANYIN KARE NYANYI 3

¹Hamalem hong ekaku batiroh, intu nupi aku manggau je eka sintangku; inggauku ie, tapi hayang bewei.

²Aku handak harikas tuntang mangaliling lewu, manasaran uras jalan je hai tuntang je korik. Aku handak manggau je eka huangku; inggauku ie, tapi gawi ngahus bewei.

³Aku inyondau awi je manjaga lewu, tuntang isekku, Aton ikau mite je eka huangku?

⁴Harun ih aku malihi ewen, aku sondau je eka huangku. Imbingku ie, tuntang dia aku malekake sampai imbitku akan human induku, akan kamar oloh je manak aku.

⁵Keleh manyanyi, o kare bawin Yerusalem, tagal kare bajang tuntang kare karahau intu padang, je keton dia akan manderoh sinta, sampai jete imeda.

⁶Narai jete je dumah bara padang pasir, sama kilau kangkewol asep? Kamangat ewaue sama kilau mur tuntang manyan, tuntang kare kasai mangat ewaue bara oloh dagang.

⁷Item, jete tandu ain Salomo, ingaliling jahawen puluh oloh menteng, kare oloh menteng Israel,

⁸je are pangatawae hong parang. Ewen uras manangking padang intu kahange tatap manaharep oloh je manyarang metoh hamalem.

⁹Salomo manampa akae kabuat ije tandu, bara kayu je kapala bahalap.

¹⁰Jihie inampa bara perak tuntang sanggahae bara amas. Eka pandudukae benang ungu, inyulam dengan kasanang atei awi kare bawin Yerusalem.

¹¹Keleh balua, o kare bawin Sion, tampayah Raja Salomo, dengan makota je ingkepan indue, hong andau ie kawin hong andau ie hanjak rantang.