Read Ngaju NYANYIN KARE NYANYI 4 Bible Online

NYANYIN KARE NYANYI 4 - Ngaju bible

NYANYIN KARE NYANYI 4

¹Ikau bahalap toto, manisku, Toto haliai ikau paham bahalap. Matam penda sandurongm sama kilau burong dara; balaum sama kilau kawan kambing, je mohon bara kare bukit Gilead.

²Kasingam baputi sama kilau kawan tabiri je harue inggunting tuntang impandoi; hapasang sama kilau kare anak tabiri hatatup, ije mahin jaton je nihau.

³Totok biwihm sama kilau ije kalambar pita bahandang, tuntang akai kahalap nyamam. Pipim sama kilau silan bua delima, basahokan penda sandurongm.

⁴Uyatm sama kilau candin Dawid, je imangun eka mingkes sanjata. Rantaim sama kilau sakoyan talawang, ganggaman uras kare oloh menteng.

⁵Tusom sama kilau due anak bajang, anak bajang hatatup je metoh kuman oru marak kare kambang bakung.

⁶Mipen angatku haguet akan bukit mur, akan bukit manyan, sampai hakius riwut hanjewu, je mampanihau kakaput alem.

⁷Ikau bahalap toto, manisku, jaton ampin kasalan biti berengm.

⁸Ayo itah mohon bara Libanon, o panganten ayungku, ayo itah mohon bara Libanon. Keleh mohon bara tantan Amana, bara tantan Senir tuntang Hermon, eka melai hangkulih tuntang singa.

⁹Ikau mawi ateiku taliuk dengam, andi, panganten aingku, ikau bahalap intu aku dengan tampayah matam, dengan intan bungas intu rantaim.

¹⁰Paham mangat sintam, andi, panganten aingku, kejau labih mangat bara anggor. Minyakm mangat ewaue manampaur, labih bara kakare macam rarampah.

¹¹Kare auhm manis, panganten aingku, sama kilau mado asli tuntang susu. Pakaiam sama kamangat ewaue dengan Bukit Gantong Libanon.

¹²Je eka sintangku iete kabon badinding, kabon badinding batu, tahasak danum takunci.

¹³Intu hete kare batang delima belom, dengan kare bua je paling mangat. Kambang Kiprus tuntang nardus,

¹⁴nardus, henda, kayu manis, tuntang tewu, dengan kare macam batang manyan. Mur tuntang garo, dengan kare macam rarampah je jari iintih.

¹⁵Bara tahasak danum intu kabongku manampusak danum pambelom je mahasor bara Libanon!

¹⁶Keleh misik, o riwut utara, dumah o riwut salatan! Keleh kiu-kius, hong kabongku, nauhe kamangat ewaue manampaur. Keleh je eka sintangku dumah akan kabon aie, tuntang kuman kare buae je mangat.