Read Ngaju NYANYIN KARE NYANYI 5 Bible Online

NYANYIN KARE NYANYI 5 - Ngaju bible

NYANYIN KARE NYANYI 5

¹Aku dumah akan kabongku, andi, panganten ayungku, imumpongku mur tuntang rarampahku; kinangku sarangan bajanyi tuntang mado akangku, ihopku susu tuntang danum anggorku. Keleh kuman tuntang mihop, o kare kawal sampai keton babusau sinta.

²Aku batiroh, tapi ateiku misik. Hiningku, je eka sintangku mangatok bauntonggang. Uap bauntonggang, andi, je eka sintangku, burong dara ayungku, eka taran ateiku; takolokku bisa awi ambon, balauku kontep pantis ambon hamalem.

³Bajungku jadi iengkakku; en kareh ingkepangku tinai? Paingku jadi ienyauku en kareh imapaku tinai?

⁴Ruga-rugap usokku awi je eka sintangku mimbing tundun bauntonggang.

⁵Palus aku misik handak muap bauntonggang akan je eka sintangku. Mur mahantis bara lenge tuntang tunjokku, mambisa tundun kunci bauntonggang.

⁶Imbangahku bauntonggang akan je eka sintangku, tapi ie jari mules tuntang haguet. Aku paham taharu dengan auhe, inggauku ie tapi jaton. Intehauku arae, tapi ie dia tombah.

⁷Aku inyondau awi kare oloh jagan lewu; ewen mamukul tuntang mampahimang aku, sandurongku induan ewen dengan paksa.

⁸Keleh hajanji, o kare bawin Yerusalem, amon keton sondau je eka sintangku, keleh ngabar akae tahiu aku je haban ganan sinta.

⁹En je inyintam labih bara kare oloh beken je inyinta, o oloh bawi je paling bahalap? En je inyintam labih bara kare oloh beken je inyintam, sampai ikau manyoho ikei hajanji?

¹⁰Je eka sintangku gagah tuntang bakena, pangkatamame marak sapuluh koyan biti.

¹¹Takoloke kilau amas, amas tulen, balaue hagalombang tuntang babilem, sama kabilem kilau kak.

¹²Matae kilau burong dara intu tahasak danum, burong dara mandoi susu, mondok intu saran talaga.

¹³Pipie kilau kabon rarampah je mangat ewaue, biwihe kambang bakung, je mampahantis mur asli.

¹⁴Lengee bahalap, batisin amas dengan permata, bitie kilau gading inatah batu nilam.

¹⁵Paie sama kilau jihin marmar baputi, dengan galang amas tulen. Berenge tumon kagagah kare bukit gantong intu Libanon, tuntang tumon kaparis batang seder.

¹⁶Paham manis kotak tuture, taloh handiai intu ie mambet. Tumon te sintangku tuntang sobatku, o kare bawin Yerusalem!