Read Ngaju NYANYIN KARE NYANYI 6 Bible Online

NYANYIN KARE NYANYI 6 - Ngaju bible

NYANYIN KARE NYANYI 6

¹Akan kueh je inyintam haguet, o oloh bawi je paling bahalap? Akan kueh je inyintam haguet, uka ikei omba manggaue?

²Je eka sintangku haguet akan kaboe, akan kabon rarampah akan manyakatik kare tabiri hong parak kayu, tuntang mamutik kare kambang bakung.

³Aku ayun je eka sintangku, tuntang ie ayungku, ie manyakatik kare tabiri intu bentok kare kambang bakung.

⁴Ikau bahalap, manisku, sama kilau kabungas lewu Yerusalem, sama kilau kahalap lewu Tirsah. Ikau paham maliuk atei, sama kilau pasukan tantara dengan kare banderae.

⁵Keleh mules baum bara aku, awi tampayah matam mampanyanyau aku. Balaum sama kilau kawan kambing je mohon bara kare bukit Gilead.

⁶Kasingam baputi sama kilau kawan tabiri je harue inggunting tuntang impandoi; hapasang sama kilau kare anak tabiri hatatup, ije mahin jaton je nihau.

⁷Pipim sama kilau silan bua delima, basahokan penda sandurongm.

⁸Aloh aton jahawen puluh ratu, tuntang hanya puluh gundik, hayak kare bawi tabela je are toto,

⁹tapi baya ije burong dara ayungku, je eka kanahuangku anak tunggal eka kasayang indue. Kare oloh bawi mite tuntang manara ie, kare ratu tuntang gundik manara ie.

¹⁰Eweh ie je dumah sama kilau kalawan andau sawah, je kahalap bulan bunter, sama kilau kalawan matanandau? Ie paham mangatau atei, sama kilau pasukan tantara dengan kare banderae.

¹¹Aku dumah manalih kabon kanari, mite kare sulohe intu janah; mikeh batang anggor jari aton sulohe, tuntang batang delima jari mangambang.

¹²Aku paham taharu dengan sintam, sama kilau aku taharu mandai kareta parang hayak kare bangsawan.

¹³Keleh manari, o bawin Sulam, keleh baputa-putar mangat ikei jungun awie. Mbuhen keton handak mananture aku, metoh aku manari hong bentok barisan oloh manonton?