Read Ngaju NYANYIN KARE NYANYI 7 Bible Online

NYANYIN KARE NYANYI 7 - Ngaju bible

NYANYIN KARE NYANYI 7

¹O oloh bawi tabela je mantoh, manis toto paim dengan sandal te. Pangun sapakm sama kilau hiasan, gawin ije biti oloh seni.

²Puserm sama kilau sangkir bunter, je dia puji tapas anggor campur. Kanaim sama kilau tuyok gandom, ingaliling kare kambang bakung.

³Tusom sama kilau due anak bajang, karahau tatup due.

⁴Uyatm sama kilau candi gading. Matam sama kilau kare talaga Hesbon, tokep lawang Batrabim. Urongm sama kilau candi intu bukit Libanon, je manaharep lewu Damaskus.

⁵Takolokm sama kilau bukit Karmel; balaum je impahalap sama kilau sutra, mangatau atei, sampai raja kea.

⁶Toto bahalap ikau, je inyinta marak je eka karajin.

⁷Bitim mantoh sama kilau batang korma, tusom tundun buae.

⁸Mipen angatku mandai batang korma te, tuntang mandino kare buae. Keleh tusom sama kilau tundun bua anggor, tahasengm kamangat ewau bua apel,

⁹nyamam kamanis danum anggor! Keleh anggor te mahasor akan je eka sintangku, dia tera-terai; tuntang mampisik sinta intu kare oloh je kanjerae batiroh haream.

¹⁰Aku ayun je eka sintangku, ie handak dengangku.

¹¹Ayo itah akan padang, je eka sintangku, tuntang baramalem intu tana intu bentok kambang kiprus.

¹²Ayu itah hayak hanjewu akan kabon tuntang mite en batang anggorjari manyalampak, tuntang kambange jari burai; en batang delima jadi mangambang. Intu hete kareh inengaku sintangku akam.

¹³Batang arak manampaur ewaue, tokep bauntonggang itah aton karebua mangat, je jari tahi imutik tuntang je taheta; je ingkesku akam, je eka sintangku.