Read Ngaju NYANYIN KARE NYANYI 8 Bible Online

NYANYIN KARE NYANYI 8 - Ngaju bible

NYANYIN KARE NYANYI 8

¹Jaka ikau paharingku ije kalambutan, je puji manusu induku, batantu inyiumku ikau amon sondauku intu jalan, jaton je manawah aku.

²Ikau imbitku akan human induku, mangat ikau tau manggau aku. Ikau kareh impihopku hapan anggor je mangat ewaue, tuntang danum bua delima.

³Lengem hila sambil manahan aku, lengem gantau mamalok aku.

⁴Keleh hajanji, o kare bawin Yerusalem, je keton dia handak manderoh sinta, sampai ie imeda.

⁵Eweh te je dumah bara padang pasir, basingguh dengan je inyintae? Impisikku ikau intu penda batang apel ekam inihi tuntang inakan

⁶Awi aku eka huangm ela mamalok eweh bewei beken bara aku; awi sinta te kaabas pampatei tuntang mipen kuasa sama kilau pampatei. Nyalae sama kilau nyalan apui je ganda-gandang.

⁷Danum je are dia olih mambelep sinta, tuntang danum soho dia olih mampahantonge. Amon oloh manenga uras panataue hapa mamili sinta, ie baya dinon tawah oloh.

⁸Ikei tempon ije andi bawi je magon korik tusoe. Narai je akan ilalus ikei akae amon aton je dumah maja misek ie?

⁹Jaka ie ije dinding batu, kareh ikei mampendeng candi perak hunjue. Jaka ie ije lawang, kareh ihuit dengan kayu seder.

¹⁰Aku toh ije dinding batu, tuntang tusongku candie. Je eka sintangku katawan je intu ie aku sanang.

¹¹Salomo tempon kabon anggor intu Baal-Hamon; kabon te inyarahe akan kare oloh je manjagae. Genep bitie mambayar sakoyan duit perak akan hasile,

¹²tuntang mandino due ratus akan kahekae. Nauhe duit te akam, Salomo, tuntang akan kare je manjaga kabom. Tapi kabon anggorku, ayungku kabuat, aton intu taharepku.

¹³O, je melai kabon, kare kawal handak mahining auhm; hakotak dengangku!

¹⁴Je eka sintangku, kantoh sama kilau bajang, sama kilau anak karahau intu petak habukit Beter.