Read Ngaju YESAYA 1 Bible Online

YESAYA 1 - Ngaju bible

YESAYA 1

¹ Buku toh basuang kare peteh tahiu Yuda tuntang Yerusalem je insanan Hatalla akan Yesaya, anak Amos, jaman Usia, Yotam, Ahas tuntang Hiskia marentah intu Yuda.

²Hining, o langit, seneh o petak! TUHAN hamauh, “Kare anak je jari ihaga-Ku mandarhaka malawan Aku.

³Sapi kasene tempoe, kalidai kasene eka panginan je inyadia tempoe. Tapi ungkup-Ku Israel dia; ewen dia haratie.”

⁴Calaka keton bangsa je badosa, kare oloh je darhaka tuntang papa! Keton je tambohos tagal dosan keton. Keton jari manolak TUHAN tuntang manalikut Hatalla Je Barasih Haliai je musti inyembah keton.

⁵Mbuhen keton harajur bewei mambantah? En keton maku ihukum labih babahet hindai? Takolok keton jari kontep awi buhit, atei tuntang tirok keton kapehe.

⁶Bara takolok sampai pai jaton je barigas intu bitim. Keton jari kontep awi baha, kare kakembang tuntang himang, kare himangm te hindai irasih atawa imeteng, dia kea inatamba hapan minyak.

⁷Lewun keton jari imbinasa; kare lewum lepah ingehu. Intu taharep baun keton oloh bara lewu luar manduan petak keton tuntang marusak kare taloh samandiai.

⁸Baya Yerusalem tapalihi; tapi kilau lewu je ingapong tuntang jaton kaabas, kilau pasah intu kabon anggor atawa podok intu kabon tantimun.

⁹ Jaka TUHAN Je Jaton Tikas Kuasae dia maliwus pire-pire biti marak itah, itah jari binasa samasinde, sama kilau Sodom tuntang Gomora.

¹⁰Yerusalem, kare pamimpin tuntang bangsa aim jari kilau Sodom tuntang Gomora. Hining taloh je insanan TUHAN akam; seneh taloh je iajar Hatallan itah.

¹¹ TUHAN hamauh, “Ikau manyangka Aku mangilak kare parapah je harajur iluput keton akang-Ku? Aku peda belai-Ku dengan kare tabiri akan parapah je ingehum tuntang enyak anak sapim. Dahan sapi hatuee, tabiri tuntang kambing dia Aku marajie.

¹²Eweh manyoho keton mimbit kare parapah te hong katika keton dumah sombayang intu Aku? Eweh manyoho keton mimbit kare parapah intu Huma Barasih aing-Ku?

¹³Hayang bewei gawin keton mimbit parapah te. Aku bajilek mangkeme ewaue, Aku basingi tuntang dia olih mite keton mahaga Bulan Taheta, kare andau Sabat tuntang kare andau hai hayak kare pumpong agama. Uras taloh te imapa keton hapan kare dosan keton tuntang jadi tanggongan akang-Ku; Aku jari heka mananggonge.

¹⁵Amon keton manggatang lengen keton handak balakudoa, Aku dia maku manampayah. Dia paduli kilen kare lakudoan keton, Aku dia maku mahininge, awi hapan lengen keton te are oloh jari buah patei.

¹⁶Enyau arep keton sampai barasih. Paterai uras kare kapapa je ilalus keton te. Yoh, ela tinai mawi kapapa,

¹⁷keleh bajar malalus kahalap. Haga kabujur tuntang kanan katulas. Keleh tenga akan kare nule hak ewen tuntang dohop kare balo.”

¹⁸TUHAN hamauh, “Keleh itah mahapus taloh toh. Aloh keton randa-randang tagal kare dosan keton, keton akan ienyau-Ku sampai baputi toto kilau kapas.[1] Aloh kare dosan keton are tuntang babehat, Aku akan mampun keton sampai lepah barasih.

¹⁹Amon keton manumon auh-Ku, keton akan mangkeme uras taloh je bahalap je ihasil lewun keton.

²⁰Tapi Amon keton malawan Aku, keton akan matei hong parang. Aku TUHAN, jari hakotak.”

²¹Lewu je bihin bahalap toh kilau lontei! Bihin uras oloh lewue bujur tuntang buah, tapi toh hinje tirok dengan kare pamuno.

²²Yerusalem, bihin ikau sama kilau perak, tapi toh dia barega hindai. Bihin ikau kilau anggor je mangat, tapi toh uras danum bewei.

²³Kare pamimpin ayum mandarhaka tuntang pai lengem panakau, ewen rajin manarima panenga tuntang duit sogok. Ewen dia maku mandohop nule intu pangadilan; dia maku mahining kadon kare balo.

²⁴Tagal te TUHAN Je Jaton Tikas Kuasae, Hatallan Israel hamauh, “O kare musoh-Ku, Aku akan mambaleh mawi keton, sampai keton dia manyusah Aku tinai.

²⁵Aku akan marasih keton kilau oloh marasih salaka, keton akan irasih-Ku; kare taloh je papa akan inganang-Ku bara keton.

²⁶Keton akan inenga-Ku tinai kare hakim tuntang panasehat kilau horan. Palus Yerusalem akan inggare lewu je bujur tuntang baketep.”

²⁷TUHAN te bujur, Ie akan manyalamat Yerusalem, tuntang kare oloh je mamparahan kanyasal.

²⁸Tapi kare oloh badosa je mandarhaka malawan Ie akan imbinasa Awie, tuntang uras kare oloh je malihi Ie akan impalomos.

²⁹Ewen akan impahawen awi ewen manyembah kare batang kayu tuntang mingkes kare kabon baya akan kare dewa.[2]

³⁰Ewen akan manjadi sama kilau batang kayu hai je balayu dawee, tuntang sama kilau kabon je dia inata hapan danum.

³¹Kilau tampilai je bakehu awi tampitik kambang apui, tumon te kea Aku aton kuasa uka mambinasa ewen awi kare gawi papa ain ewen kabuat, tuntang jaton taloh je tau mambalang kahancor te.