Read Ngaju YESAYA 10 Bible Online

YESAYA 10 - Ngaju bible

YESAYA 10

¹Calaka keton je manampa kare hukum je dia adil uka mangapehe bangsa ayung-Ku.

²Hapan cara te keton mangahana oloh je belom susah mandino hak tuntang kaadilan, tuntang marampas taloh je ain kare balo tuntang nule.

³Narai je iawi keton hong andau Hatalla mahukum keton? Narai gawin keton metoh Ie mampalembut calaka bara lewu je kejau? Dengan eweh keton akan balaku dohop? Hong kueh eka keton manyahokan panatau keton te?

⁴Kajarian pambelom keton baya matei huang parang atawa iimbit jadi tawanan. Tapi TUHAN magon sangit tuntang tetep mahukum.

⁵ TUHAN hamauh, “Calaka Asur! Asur ihapa-Ku kilau pahampas akan mamukul kare oloh je ilait-Ku.

⁶Aku manyoho Asur uka manyarang bangsa ayung-Ku je layau tuntang je mawi Aku sangit. Aku manyoho Asur uka marampok tuntang manakau. Tuntang manijak-manandik bangsa ayung-Ku sama kilau kawo intu jalan.”

⁷Tapi raja Asur aton rencanae kabuat. Ie hajanji mahapan kakaras tuntang mambinasa are bangsa.

⁸Ie mampatamam arepe, koae, “Kare pangkalima ayungku uras raja!

⁹Irabutku kare lewu Kalno tuntang Karkemis, Hamat tuntang Arpad. Irabut-Ku kea kare lewu Samaria tuntang Damaskus.

¹⁰Impakalahku kare karajaan je manyembah kare hampatong dewa je labih kuasa bara je aton intu Yerusalem tuntang Samaria.

¹¹Samaria tuntang uras kare hampatong dewa jari imbinasa-Ku. Kalote kea aku akan malaluse intu Yerusalem mawi uras kare hampatong dewa je inyembah intu hete.”

¹²Tapi TUHAN hamauh, “Taloh je handak ilalus-Ku intu Bukit Sion tuntang Yerusalem te jari manjadi, Aku akan mahukum raja Asur awi kajohoe tuntang kagantong ateie.”

¹³Raja Asur mangamburau, koae, “Uras kare taloh te ilalusku hapan kuasangku kabuat. Aku pintar tuntang harati. Aku manganan kare watas helat kare bangsa, tuntang marampas kare taloh je inyadia ewen. Kilau banteng aku mahunje-manandik kare oloh je marentah.

¹⁴Kare bangsa hong kalunen sama kilau sarangan burong; dia bahali aku manduan kare ramon panatau ewen, sama kilau makop tanteloh je ilihi intu sarangae. Jaton ije palapas je mangepek, jaton ije je hanganga totoke atawa je mahiau hakiak.”

¹⁵Tapi TUHAN hamauh, “En tau kapak mampatamam arepe intu taharep oloh je mahapan ie? En garagaji labih mambatang bara oloh je mahapae? Dia ie tukol je manggatang oloh, tapi oloh je manggatang tukol.”

¹⁶Awi Asur jari mampatamam arepe, maka TUHAN Je Jaton Tikas Kuasae akan mampalembut panyakit uka mahukum kare perwira je taga-tagap. Ewen akan buah darem paham sama kilau apui je mangehu raju-rajur.

¹⁷Hatalla je barasih, Kalawan Israel, akan jadi nyalan apui je hong ije andau mangehu lepah taloh samandiai sampai akan kare onak duhi.

¹⁸Kare parak kayu tuntang kare tana je bajewong intu lewu Asur akan imbinasa samasinde, kilau oloh haban je ungi-ungin sampai matei.

¹⁹Kare batang kayu akan batisa isut bewei, sampai anak korik mahin tau misee.

²⁰Katikae kareh sampai tisan bangsa Israel dia hindai manyarah kajarian pambelome akan bangsa je mimbing kuasa je bilak mambinasa ewen, malengkan akan TUHAN, Hatallan karasih Israel.

²¹Tisan bangsa Israel je isut akan hobah uka manempo Hatalla ije paham tamam.

²² Aloh Israel toh sama karee dengan bawak batu karangan intu tasik, baya pire-pire biti oloh bewei je akan haluli. Hukuman bara TUHAN jari tokep, tuntang puna patut tuntang adil amon bangsa te imbinasa.

²³Yoh, hapus lewu akan impahancor awi TUHAN Je Jaton Tikas Kuasae; jete je inukas TUHAN tuntang dia tau iobah tinai.

²⁴TUHAN Je Jaton Tikas Kuasae hamauh dengan ungkup Ayue je melai intu Sion, “Ela mikeh dengan oloh Asur, aloh ewen tulas tuntang mangapehe keton kilau je ilalus awi oloh Misir horan.

²⁵Hanjolo ih kasangit-Ku dengan keton, limbah te Aku akan mambinasa ewen.

²⁶Aku TUHAN Je Jaton Tikas Kuasae, akan mahewes ewen hapan cambuk, kilau Aku mahewes oloh Midian intu bukit batu Oreb. Aku akan mahukum Asur, kilau Aku mahukum Misir.

²⁷Hong katika te Aku akan mambebas keton bara katulas oloh Asur, tuntang ewen dia tinai kuasa hunjun keton.”[21]

²⁸Tantara Asur jari marabut lewu Ayat.[22] Ewen jari mahalau Migron! Bahatan ewen ilihi intu Mikhmas!

²⁹Ewen jari mahalau dampahan eka dimpah tuntang baramalem intu Geba! Oloh lewu Rama hagenjeh, tuntang oloh lewu Gibea, lewun Raja Saul, jari mandari arepe.

³⁰Keleh mangkariak, o oloh lewu Galim! Hining, o oloh lewu Laisa! Keleh tombah o oloh lewu Anatot!

³¹Oloh lewu Madmena tuntang Gebim hadari buhau.

³²Andau toh musoh aton intu lewu Nob, tuntang intu hete ewen mantajok tampare manintu bukit Sion, akan lewu Yerusalem.

³³TUHAN Je Jaton Tikas Kuasae akan mampalongkang ewen kilau edan inetek bara batange. Je paling hai tuntang gantong bara marak kare edae te inetek tuntang impalihang.

³⁴TUHAN akan mampalihang ewen, sama kilau batang kayu hong bentok parak kayu je ineweng hapan kapak. Aloh ewen abas kilau batang kayu je paling tamam intu Libanon, ewen akan balongkang kea!