Read Ngaju YESAYA 11 Bible Online

YESAYA 11 - Ngaju bible

YESAYA 11

¹ Turonan Raja Dawid kilau batang kayu je jari ineweng. Tapi kilau bara tunggul je tau lembut salundik taheta, kalote kea bara turonan Dawid akan lembut ije biti raja.

²Kuasan TUHAN akan mangagalan ie, mawi ie bahalap budi basarae tuntang pintar harati, apik manduan putusan tuntang malaluse; kasene kahandak Hatalla tuntang manumon auh Ayue.

³Karajin ayue iete manumon kahandak TUHAN. Ie dia mamutus pakara hala-halau atawa manumon koan auh oloh.

⁴ Oloh je belom susah imutuse dengan adil, oloh je jaton olih mandohop arepe, indohope hapan kabujur; oloh sala ihukum awi parentahe oloh papa impalomose.

⁵ Ie mamutus dengan adil tuntang baketep hong taloh samandiai.

⁶ Sarigala akan melai hinje dengan tabiri, haramaung edan akan menter intu balikat kambing. Anak sapi akan kuman oru[23] hayak dengan anak singa. tuntang anak korik akan mangagalan ewen.

⁷Sapi akan kuman oru hayak dengan bahuang, kare anak ewen hinje menter sama-sama. Singa kuman tampilai kilau sapi.

⁸Anak awau mahin dia akan buah kapehe amon bangang tokep handipe tada.

⁹ Intu Sion, Bukit je Barasih ain Hatalla, jaton taloh je papa atawa mamparusak. Hapus oloh lewu akan kontep awi pangatawan tahiu Hatalla, sama kilau danum mangontep tasik.

¹⁰ Katikae kareh sampai, ije biti raja turonan Dawid manjadi eka kakilak kare bangsa. Ewen akan manalih ie, tuntang ekae melai akan inara.

¹¹Hong andau te TUHAN sinde tinai mahapan kuasae. Ie mimbit ungkup Ayue je batisa intu Asur tuntang Misir, intu kare lewu Patros, Sudan tuntang Elam, intu Babel, Hamat tuntang kare pulau je kejau, uka buli.

¹²TUHAN akan mampandai bandera akan kare bangsa. Jete tandae Ie mamumpong haluli bangsa Israel tuntang Yuda je kasaburan intu kare serok petak danum tuntang mimbit ewen buli.

¹³Karajaan Israel dia tinai bahiri dengan Yuda. Yuda dia tinai hamusoh dengan Israel.

¹⁴Ewen haya-hayak akan manyarang oloh Pilistin intu hila barat tuntang marampas kare taloh je ain bangsa oloh hong hila timor. Ewen akan mampakalah bangsa Edom tuntang Moab, tuntang bangsa Amon akan mamenda ewen.

¹⁵ TUHAN akan mampateah Telok Sues. Ie mampadumah riwut balasut, sampai Sungei Euprat jadi uju batang danum je surut tuntang genep bitin oloh tau dimpahe mahapan sandal.

¹⁶Akan ungkup Ayue je batisa akan aton jalan hai je balua bara Asur, kilau metoh Israel balua bara Misir.