Read Ngaju YESAYA 13 Bible Online

YESAYA 13 - Ngaju bible

YESAYA 13

¹ Jetoh peteh Hatalla, je inarima Yesaya anak Amos tahiu Babel:

²Keleh ngibar kare bandera parang intu tantan bukit je gantong! Tehau kare tantara tuntang tajok lengem mangat ewen manyarang kare lawang lewu je bajoho te.

³TUHAN jari mantehau kare pahlawan je iintih Awie. Ewen menteng, percaya dengan arepe tuntang tau iharap Awie. TUHAN manyoho ewen uka mahukum kare oloh je buah kasangit Aie.

⁴Hining auh karidu intu hunjun kare bukit gantong sama kilau auh pumpong oloh je are toto. Hining karidu kare karajaan tuntang kare bangsa je kanjerae hapumpong. TUHAN Je Jaton Tikas Kuasae mariksa pasukan parang.

⁵Ewen dumah bara lewu kejau intu kare saran petak. Huang kasangit Aie TUHAN mahapan ewen uka mambinasa hapus petak.

⁶ Keleh manatum, awi andau ain TUHAN jari tokep, iete andau kabinasa je impadumah TUHAN Je Jaton Tikas Kuasae.

⁷Genep bitin oloh akan mangkeme lemo-lupek lengee tuntang nihau kahanyie.

⁸Ewen uras akan buah kikeh je hai, tuntang mangaliat kapehe kilau oloh bawi je kanjerae luas. Ewen akan hantanture sama arepe awie gugup, baun ewen bahandang awie mahamen.

⁹Andau TUHAN akan sampai, tuntang hong andau te kasangit tuntang kalait TUHAN hasep. Petak akan manjadi keang kamahau, tuntang genep oloh badosa akan binasa.

¹⁰ Genep bintang tuntang karean bintang akan terai balawa; matanandau akan kaput katika ie lembut, tuntang bulan dia akan balawa tinai.

¹¹TUHAN hamauh, “Aku akan mahukum kalunen awi kapapae, tuntang kare oloh papa awi kare dosan ewen. Genep oloh bajoho akan imparandah-Ku, oloh je gantong ateie tuntang karas akan ihukum-Ku.

¹²Oloh je inyalamat isut toto, ewen labih jarang bara amas tolen.

¹³Aku akan mawi langit hagenjeh tuntang petak hongge bara ekae hong andau Aku, TUHAN Je Jaton Tikas Kuasae, mamparahan kasangit Aie.

¹⁴Oloh bangsa beken je melai intu Babel akan pisah darai tuntang genep bitie hadari akan lewun ayue kabuat. Ewen kilau bajang je hadari bara oloh pamandop, atawa kawan tabiri je jaton bara sakatik.

¹⁵Eweh bewei je buah tawan akan inyodok sampai matei.

¹⁶Ewen akan mite kare anak awau ewen imparamok, kare human ewen irampok tuntang kare sawan ewen ingaraen oloh.”

¹⁷TUHAN hamauh, “Aku manyoho bangsa Madai[24] uka manyarang Babel. Ewen dia tau inyogok hapan perak atawa amas.

¹⁸Hapan panahe ewen akan mampatei kare oloh tabela. Ewen dia sayang dengan anak awau tuntang dia sayang dengan anak oloh.

¹⁹ Bara kakare karajaan, Babel te paling bahalap tuntang eka karajin oloh lewue. Tapi Aku, TUHAN, akan mampahancor jete, kilau jari ilalus-Ku dengan Sodom tuntang Gomora.

²⁰Aloh ije biti mahin jaton oloh akan melai intu hete. Jaton kea oloh Arab manamuei je akan mampendeng kemahe intu hete; Jaton ije sakatik je akan mimbit kambing tabiri uka kuman oru intu hete.

²¹ Eka te akan ielai awi kare meto baliar. Burong mangkong akan manyarangan intu kare human ewen, tuntang burong onta akan melai intu hete. Kare kambing baliar akan katap-kayap intu marak duroh derep lewu.

²²Kaung aso parak kayu tuntang sarigala akan hapengkau bara kare istana Babel. Katika kahancore jari tokep tuntang katikae dia iundur tinai.”