Read Ngaju YESAYA 14 Bible Online

YESAYA 14 - Ngaju bible

YESAYA 14

¹TUHAN akan masi Israel ungkup Ayue, tuntang mintih ewen tinai jadi oloh Ayue. Ie akan mandak ewen tinai intu lewun ewen kabuat. Kare oloh bangsa beken akan dumah hinje dengan ewen.

²Are bangsa akan mandohop Israel uka haluli akan lewu je inenga TUHAN akan ewen. Kare bangsa te akan mamenda oloh Israel. Israel akan manawan kare oloh je puji manawan ewen tuntang marentah kare oloh je puji mangapehe ewen.

³TUHAN akan mambebas bangsa Israel bara kapehe tuntang kajake, tuntang bara gawi babehat je imaksa akae.

⁴Amon TUHAN malalus taloh te, ewen akan hababaka raja Babel kalotoh, “Raja je tulas jari manjato! Ie dia olih mawi kajake tinai.

⁵TUHAN jari mahapus kuasan kare panguasa je papa,

⁶je hapan kasangite mahenyek kare bangsa tuntang raju-rajur mangapehe ewen.

⁷Kajariae hapus kalunen akan sanang tuntang landang, tuntang genep bitin oloh manyanyi hanja-hanjak.

⁸Kare batang cemara Libanon hanjak awi raja je tulas te jari manjato tuntang limbah ie haguet, jaton oloh je manyoho uka maneweng ewen.

⁹Lewun oloh matei rami-rami manyambut raja Babel te. Palus misik kare hambaruan oloh je bihin mimbing kuasa intu hunjun petak, tuntang hambaruan kare raja misik bara padadusan ewen.

¹⁰Ewen uras mantehau ie, ‘Toh ikau sama kilau ikei, balemo tuntang jaton kaabasm!

¹¹Bihin ikau ihormat hapan musik kacapi, tapi toh jari aton intu hong katunis benyem lewun oloh matei. Kare uret jadi ranjangm tuntang handalai jadi kahowutm.’

¹² O raja Babel, bihin ikau bintang sawah je balawa, tapi toh jari manjato bara langit! Bihin ikau mampakalah kare bangsa, tapi toh injakah akan petak.

¹³ Ikau hajanji mandai akan langit tuntang mina padadusam intu hunjun bintang je paling gantong! Tirokm ikau tau mondok kilau raja hunjun bukit hila utara, eka kare dewa hapumpong.

¹⁴Ikau hamauh, je ikau akan mandai akan hunjun baunandau tuntang jari sama kilau Je Pangkahai.

¹⁵Padahal ikau inambohos akan hila je paling handalem bara lewun oloh matei.

¹⁶Ewen je aton intu hete akan mite ikau. Ewen akan misek, ‘En jetoh oloe je manggerek petak tuntang manarewen kare karajaan?

¹⁷En ie je mampahancor kare lewu tuntang mobah kalunen jadi padang pasir? En ie toh je dia puji malapas kare oloh tawanae atawa je manyoho ewen buli?’

¹⁸Uras kare oloh je puji jadi raja bara kare bangsa ingubur hapan kahaie intu genep kubure.

¹⁹Tapi ikau jaton ekam ingubur; hantum inganan kilau salundik je dia oloh marajie, inutup awi kare hantun pahlawan je matei hong parang, tuntang injakah hayak dengan ewen akan liang batu, kilau hantu je buah ihik.

²⁰Ikau jari mambinasa lewum tuntang mampatei bangsa ayum kabuat. Awi te ikau dia ingubur kilau raja beken. Jaton ije bara kare kaluarga ayum je papa te akan inyalamat.

²¹Gawi mamuno akan golong inampara! Kare anak hatuem akan matei awi kare dosan tato hiang ewen. Jaton ije bara ewen je akan marentah intu hunjun petak atawa mamangun kare lewu.”

²²TUHAN Je Jaton Tikas Kuasae hamauh, “Aku akan manyarang Babel tuntang mampalilape. Jaton ije biti oloh je akan inyalamat-Ku, kare anak korik mahin dia Aku manaluae belom. Aku, TUHAN, jari hakotak.

²³Babel iawi-Ku jadi loau je ielai awi burong mangkong. Babel akan impalingis-Ku. Aku, TUHAN Je Jaton Tikas Kuasae, jari hakotak.”

²⁴ TUHAN Je Jaton Tikas Kuasae sumpah: “Je jari irencana-Ku te pasti akan ilalus.

²⁵Oloh Asur je aton intu lewung-Ku Israel akan imbinasa-Ku, tuntang je aton intu kare bukit-Ku akan ihunjek-nandik-Ku. Aku akan mambebas bangsa ayung-Ku bara kapehe tuntang bara tanggongan je imaksa akan ewen awi oloh Asur.

²⁶Jetoh rencana aing-Ku akan kalunen; lengeng-Ku indepe uka mahukum kare bangsa.”

²⁷TUHAN Je Jaton Tikas Kuasae jari mamutus uka malalus jete tumon te. Ie mandepe lengen Ayue uka mahukum, tuntang jaton ije oloh je tau mangahana Ie.

²⁸ Jetoh peteh je insanan hong nyelon Raja Ahas malihi kalunen.

²⁹ O bangsa Pilistin, kayu pukul je hapa melang ikau jari bapelek. Tapi ela ikau hanjak, awi amon ije kongan handipe matei, handipe je labih bahaya tinai dumah mangganti ie, tuntang tanteloh handipe te mamusit anak naga je mahapan palapas.

³⁰Keton akan buah lau paham, tuntang uras oloh je batisa akan impatei. Tapi oloh je paling susah belom bara ungkup TUHAN akan mandino panginan. Oloh je jaton kaabase akan belom sanang tuntang landang.

³¹Keleh manatum tuntang mangkariak balaku dohop, o kare lewu Pilistin! Keleh keton samandiai uras geger awi kikeh! Baunandau kawo mangangkewol bara hila utara tanda pandumah tantara ain musoh; jaton oloh je pamikeh intu marak ewen.

³²Kilen auh tombah itah akan kare sarohan je dumah bara bangsa Pilistin? Itah akan mansanan akan ewen je TUHAN jari mamangun Sion, tuntang ungkup Ayue je kapehe akan mandino kalindong intu hete.