Read Ngaju YESAYA 15 Bible Online

YESAYA 15 - Ngaju bible

YESAYA 15

¹ Jetoh peteh TUHAN tahiu Moab. Lewu Ar tuntang Kir impalomos hong ije alem, tuntang lewu Moab manjadi suni benyem.

²Oloh lewu Dibon[25] mandai bukit uka manangis intu eka manyembah kare dewa. Oloh lewu Moab hapan kapehen atei manatum lewu Nebo tuntang Medeba. Ewen manggunting balau takoloke tuntang janggute kilau tanda kapehen atei.

³Kare oloh intu jalan hapakaian tapih karong tanda pehe atei; oloh manangis tuntang manatum intu lapangan tuntang hunjun sapau.[26]

⁴Oloh Hesbon tuntang Eleale manambawai, tuntang auh ewen ihining sampai Yahas. Kare tantara mahin hagenjeh; ewen jari nihau kahanyie.

⁵Aku masi dengan Moab! Oloh lewue hadari akan lewu Soar tuntang akan Eglat-Selisia. Aton je mahoroi jalan je manukat akan Luhit sambil manangis; aton je hadari akan Hornaim sambil mangkariak awi buah calaka.

⁶Danum Sungei Nimrim tuntang oru je tumbo intu sarae jari keang-kamahau, jaton tinai kare taloh imbul je bahijau.

⁷Kare oloh je dimpah sungei Haarabim, manggau jalan manyalamat kakare ramon panatau ewen.

⁸Intu hete-hete hong watas lewun oloh Moab tarahining auh kariak. Tatum ewen te ihining intu Eglaim tuntang Beer-Elim.

⁹Intu Dibon danum sungei jadi bahandang awi campur daha. Tuntang Hatalla akan mampadumah kare taloh je labih tamam hindai akan kare oloh intu hete. Oloh pamuno je ingirim Awie akan mampatei uras kare oloh Moab je magon belom.