Read Ngaju YESAYA 16 Bible Online

YESAYA 16 - Ngaju bible

YESAYA 16

¹Bara lewu Sela intu padang pasir, bangsa Moab mangirim tabiri uka inenga akan panguasa intu Yerusalem.

²Kare oloh Moab mentai intu tiwing Sungei Arnon sambil tanjo-tanjong sambil bingung kilau kare burong je iharak bara sarangae.

³Ewen hamauh dengan Yuda, “Keleh sanan narai taloh je musti ilalus ikei. Keleh manjadi eka manganjungen je taduh akan ikei bara lasut andau. Keleh ikei melai hong kanjungen keton. Ikei toh oloh je babuhau; sahokan ikei, tuntang ela mandarhaka mawi ikei.

⁴Soho ikei omba melai intu lewun keton. Kalindong ikei bara kare oloh je handak mambinasa ikei.” (Gawi manindas tuntang mambinasa akan terai, tuntang kare oloh je handak mampahancor tuntang mangapehe lewun oloh Israel akan lilap.

⁵Limbah te ije bara turonan Dawid akan jadi raja, tuntang ie akan marentah bangsa ayue hapan asie tuntang kaketepe. Ie akan mahaga kaadilan tuntang langkap mamutus uka malalus taloh je bujur.)

⁶Bangsa Yuda hamauh, “Ikei jari mahining tahiu kajohon oloh bangsa Moab. Ikei katawan je ewen te gantong ateie hayak balecak. Kotak pander ewen baya kamburau je jaton rimae.”

⁷Awi te keleh oloh bangsa Moab manatum sama arepe. Keleh ewen manangis amon ewen mingat panginan mangat je bahut kinan ewen intu lewu Kir-Hareset. Keleh ewen bageto kaharap tuntang manyewut hakayah.

⁸Kare tana tokep Hesbon tuntang kare kabon anggor Sibma jari imbinasa, kare kabon je bahut mahasil anggor je paling bahalap akan kare panguasa bangsa tuntang je mambusau ewen. Bihin kare kabon anggor te kalombahe sampai lewu Yaeser; tuntang akan hila timor sampai padang pasir, tuntang hila barat sampai dipah silan Tasik Matei.

⁹Toh aku manatum batang anggor Sibma sama kilau aku manatum Yaeser. Aku manusoh danum matangku akan Hesbon tuntang Eleale, karana hasil petake lepah kinan awi musoh.

¹⁰Jaton ije oloh je impahanjak intu kare tana je bajewong te. Jaton ije oloh je mambo auh tampik surak atawa manyanyi intu kabon anggor. Jaton ije oloh je mahamis anggor uka manampa danum anggor. Aku jari mampaterai surak kahanjak akan ewen.[27]

¹¹Ateiku mangkariak tuntang lenyoh mite ampin lewu Moab tuntang lewu Kir-Heres.

¹²Moab heka-heka manukat bukit eka maluput parapah akan eka sombayang ewen mangat balakudoa, tapi jaton hasile.

¹³Jete peteh je bihin insanan TUHAN tahiu Moab.

¹⁴Tuntang toh TUHAN hamauh, “Pas telo nyelo tinai, kare panatau je impatamam awi Moab akan lilap. Rayate je are akan manjadi isut bewei tuntang balemo.”