Read Ngaju YESAYA 17 Bible Online

YESAYA 17 - Ngaju bible

YESAYA 17

¹ TUHAN hamauh, “Damaskus dia tinai kilau lewu, tapi kaleka duroh derep lewu bewei.

²Kare lewu intu Siria akan ilihi palus katatahie[28] tuntang jadi eka kawan meto; jaton ije biti oloh je tau maharak ewen.

³Israel akan nihau je eka kalindonge tuntang Damaskus akan nihau kamardekae. Oloh Siria je magon batisa akan belom asi-asi kilau oloh Israel. Aku, TUHAN Je Jaton Tikas Kuasae, jari hakotak.”

⁴TUHAN hamauh, “Akan sampai katikae panatau Israel lepah, tuntang kasanang kamangate lilap.

⁵Israel akan sama kilau tana intu Repaim je gandome lepah inggetem awi oloh, tuntang baya batisa isut bewei.

⁶Kilau batang undus je lepah imutik buae, tuntang impelai isut ih intu kare lawin edae, kalote kea hong Israel isut biti bewei oloh je akan salamat. Aku, TUHAN, Hatallan Israel jari hakotak.”

⁷Hong andau te oloh akan haluli balaku dohop dengan je manampa ie, Hatalla Je Barasih ain Israel.

⁸Ewen dia tinai maharap hasil bara tampan lengen ewen kabuat, iete kare mesbeh eka manotong garo, tuntang kare hampatong Dewi Asera.

⁹Hong andau te, kare lewun oloh Israel je dehen dinding kotae akan manjadi eka duroh-derep lewu je tunis benyem, kilau kare lewu je ilihi awi oloh Hewi tuntang oloh Amori[29] katika ewen hadari bara Israel.

¹⁰Israel, ikau jari mangalapean Hatalla je manyalamat tuntang mangalindong ikau kilau bukit batu je dehen. Tapi salenga ikau jari mimbul kare kabon akan kare dewa.[30]

¹¹Tapi aloh taloh imbul te palus manyalundik tuntang mangambang hong andau ikau mimbule, tapi jete jaton akan mimbit hasil. Je aton baya kasusah tuntang angat kapehe je dia tau nihau.

¹²Kare bangsa je abas metohe ridu; auhe mangguroh kilau letus riak tasik je tamam.

¹³Ewen miar kilau sohon danum je paham hai. Tapi Hatalla maancam ewen, palus ewen mandari arepe sampai akan eka kejau. Ewen inggoang sama kilau bulu intu hunjun bukit je inampur riwut, atawa kawo je inarawang riwut barat.

¹⁴Katika andau sasanja ewen mampadumah kikeh je paham, tapi tokep hanjewu ewen jari nihau. Jete kajarian kare oloh je marampas taloh je jadi ain itah.