Read Ngaju YESAYA 18 Bible Online

YESAYA 18 - Ngaju bible

YESAYA 18

¹ Bara ije lewu intu hila dipah kare Sungei Sudan tarahining tantengong meto korik.

²Bara lewu te dumah kare sarohan mahalau Sungei Nil mahapan jukong sudor. O, Kare sarohan je sanggam, jeleng buli akan lewum je ihoroi awi kare Sungei te. Imbit peteh akan bangsa aim je abas tuntang menteng, kare oloh ayum je gantong tuntang tempon upak biti je lamos tuntang ingikeh intu hapus kalunen.

³O, kakare keton je melai hunjun petak! Keleh nantuani amon kare bandera aing-Ku iniring intu tantan kare bukit! Keleh hining amon tarompet impahiau!

⁴TUHAN hamauh dengangku, “Bara eka-Ku melai intu ngambo Aku handak mite akan penda dengan sanai tuntang tarang, kilau kasanai ambon je inampa hong alem je balasut hong wayah pandang, tuntang kilau katarang matanandau katika handau.

⁵Helo bara wayah bua, metoh kambange jari baduroh tuntang bua anggor jari keang intu batange, Sudan akan impahancor musoh, kilau kamangat pisau manetek kare pating kayu bara batang anggor.

⁶Kare hantun tantarae akan ilihi jadi panginan kare burong hong wayah pandang, tuntang kare meto basiak hong wayah sadingen.”

⁷Akan sampai katikae kare parapah iluput akan TUHAN Je Jaton Tikas Kuasae bara lewu te je eka kare sungei mahasor, bara bangsae je abas tuntang menteng, bara kare oloh je gantong tuntang tempon upak biti je lamos tuntang ingikeh awi oloh hong hapus kalunen. Ewen akan dumah akan Bukit Sion, akan eka TUHAN Je Jaton Tikas Kuasae inyembah.