Read Ngaju YESAYA 19 Bible Online

YESAYA 19 - Ngaju bible

YESAYA 19

¹ Jetoh peteh tahiu Misir. TUHAN dumah akan Misir mahapan baunandau je balias. Kare hampatong dewan oloh Misir hagenjeh intu taharep Ie tuntang oloh Misir mikeh.

²TUHAN hamauh, “Aku akan mawi parang marak oloh hampahari intu Misir: Pahari malawan pahari, oloh huma ije malawan oloh huma je beken, oloh lewu ije malawan lewu je beken, karajaan ije malawan karajaan je beken.

³Aku akan mambalang kare rencana Misir tuntang manggeto semangat ewen. Ewen akan balaku dohop dengan kare hampatong dewa, balaku nasehat tuntang pangatawan bara kare dukun tuntang kare roh.

⁴Aku handak manyarah Misir akan lengen raja je tulas je marentah ewen hapan kakaras. Aku, TUHAN Je Jaton Tikas Kuasae, jari hakotak.”

⁵Danum Sungei Nil akan surut tuntang misut-misut teah.

⁶Kare tarusan akan ewau maram katika danume sasar lepah. Purun tuntang oru akan balayu.

⁷Uras tangkaranak binyi hong hapus saran Sungei Nil akan keang palus inamput riwut.

⁸Kare oloh palauk je bahut manggau lauk intu sungei te akan mangkariak tuntang manangis awi pisi tuntang lunta ain ewen dia baguna tinai. Kare tukang manampa lawai akan bageto kaharap;

⁹ewen tuntang oloh je duan upah akan kapehe atei tuntang nihau semangat.

¹¹Toto bureng kare pamimpin lewu Soan! Oloh Misir je paling pintar manenga nasehat je humong! Bahanyi toto ewen mansanan akan raja je ewen turonan kare oloh pintar tuntang raja intu jaman horan!

¹²O raja Misir, kueh kare panasehat tuan raja je pintar te? Mikeh ewen katawan taloh je irencana TUHAN Je Jaton Tikas Kuasae akan Misir.

¹³Kare pamimpin Soan tuntang Mempis iete uras oloh je humong. Ewen te dia ie oloh je mamimpin, tapi mampalayang bangsa haream.

¹⁴TUHAN bewei je manyoho ewen manenga nasehat je mawi kabembang. Kajariae Misir saraba sala, tuntang ruyong-rayang sama kilau oloh babusau hayak tanggarurus hunjun utae kabuat.

¹⁵Intu Misir jaton tinai oloh je magon aton kaabas, aloh oloh panguasa atawa rayat, aloh oloh basewut aloh oloh korik.

¹⁶Akan sampai katikae bangsa Misir jadi kilau oloh bawi je pamikeh. Ewen hagenjeh mikeh amon mite TUHAN Je Jaton Tikas Kuasae mantajok lengee uka mahukum ewen.

¹⁷Tanah Yuda jadi taloh je manarewen akan oloh Misir amon ewen impingat tahiu putusan TUHAN Je Jaton Tikas Kuasae tahiu ewen.

¹⁸Hong katika te basa Ibrani akan ihapan intu lime lewu Misir. Kare oloh intu hete sumpah mahapan aran TUHAN Je Jaton Tikas Kuasae. Ije bara lewu te akan inyewut “Lewun Matanandau.”

¹⁹Katika te intu bentok lewun oloh Misir akan aton ije mesbeh akan TUHAN, tuntang intu watas lewu te aton ije tugu batu je tantai akan TUHAN.

²⁰Mesbeh tuntang tugu te kilau tanda je TUHAN Je Jaton Tikas Kuasae aton intu Misir. Amon bangsa te ingapehe, tuntang ewen mantehau balaku dohop dengan TUHAN, Ie akan manyoho ije biti oloh uka manyalamat ewen.

²¹TUHAN akan mamparahan Arepe akan bangsa Misir, tuntang ewen akan kasene tuntang manyembah Ie, hayak mimbit parapah Akae. Ewen akan mansanan janji Akae hapan sumpah tuntang malalus jete.

²²TUHAN akan manjera belai bangsa Misir, tapi limbah te Ie akan mampakeleh ewen. Ewen akan hobah tuntang mules talih TUHAN tuntang Ie akan mahining lakudoan ewen palus manenga karigas.

²³Intu katika te akan aton jalan hai helang Misir tuntang Asur. Oloh bara kadadue lewu te akan lulang-luli mahalau jalan te tuntang ewen akan sombayang sama-sama.

²⁴Hong katika te Israel akan sama kagantong pondoke dengan Misir tuntang Asur, tuntang telo bangsa te akan manjadi berkat akan hapus oloh kalunen.

²⁵TUHAN Je Jaton Tikas Kuasae akan mamberkat ewen tuntang hamauh, “Aku mamberkat ikau, o Misir ungkup-Ku, Asur tampan lengeng-Ku, tuntang Israel ungkup je iintih-Ku.”