Read Ngaju YESAYA 2 Bible Online

YESAYA 2 - Ngaju bible

YESAYA 2

¹Jetoh peteh Hatalla tahiu Yuda tuntang Yerusalem je inarima Yesaya anak Amos:

²Hong rahian andau bukit eka Human TUHAN jari gantong tuntang mendeng segah intu hunjun kare bukit tuntang lungkoh. Kare bangsa are dumah-dumaha akan hete,

³ewen handiai hamauh, “Keleh mandai talih Bukit TUHAN,[3] akan human Hatallan Israel. Ie akan majar itah taloh je musti ilalus itah. Itah akan manuntut jalan Aie, awi auh ajar TUHAN dumah bara Yerusalem, Ie hakotak bara Sion.”

⁴ Ie akan mahakim marak kare bangsa, tuntang mamutus pakara marak kare suku bangsa. Padang akan iawie jadi luku, tuntang lunju iawie jadi pisau hapan manatak oru. Kare bangsa dia tinai hasarang, dia kea tata-tatap handak parang.

⁵O turonan Yakob, keleh itah mananjong hong kalawan TUHAN!

⁶O Hatalla, Ikau jari malihi ungkup Ayum, turonan Yakob! Awi intu hete-hete hong lewu toh, oloh mahapan kare kaji lampah je bara hila timor tuntang bara Pilistin.[4] Kare oloh manyonto kare hadat oloh bangsa beken.

⁷Lewun ewen kontep awi perak tuntang amas, tuntang panataue jaton bara tikas. Kudae are toto, tuntang karetae dia taraise.

⁸Intu hete-hete aton hampatong dewa, tuntang ewen manyembah kare hampatong tampan lengen ewen kabuat.

⁹Genep oloh akan inawah tuntang imparandah. Ela mampun ewen o TUHAN!

¹⁰ Ewen kareh tame akan kare goha intu bukit batu, atawa mangali lowang intu petak uka lapas bara kasangit TUHAN tuntang bara kuasan Aie je hai.

¹¹Oloh bajoho akan imparandah, tuntang oloh balecak imparongkok-Ku. Baya TUHAN bewei je impahai.

¹²Andau te TUHAN Je Jaton Tikas Kuasae akan mamparandah uras kare oloh je mampagantong arepe tuntang mahukum kare oloh je bajoho tuntang je balecak.

¹³Kare batang cemara je gantong intu Libanon tuntang uras batang kayu hai intu Basan akan imbinasa.

¹⁴Kare bukit gantong tuntang kare lungkoh je tamam kahai akan imparata.

¹⁵Kare candi je gantong tuntang kare lewu badinding batu akan inderep.

¹⁶Kare kapal je paling hai tuntang bahalap akan impaleteng.

¹⁷Oloh bajoho akan imparandah, tuntang oloh je balecak imparongkok. Baya TUHAN bewei je impahai.

¹⁸Kare hampatong dewa akan nihau samasinde.

¹⁹Katika TUHAN misik tuntang mongge petak, oloh kareh tame akan kare goha intu kare bukit batu atawa mangali lowang intu petak uka lapas bara kasangit TUHAN tuntang bara kuasan Aie je hai. Amon andau te dumah, kare hampatong dewa bara perak tuntang amas je inampa tuntang inyembah ewen te akan ilihi kakai bewei akan balawau tuntang pandan.

²²Jadi, ela harap dengan olon je belom minjam bewei, awi ie dia barega.