Read Ngaju YESAYA 21 Bible Online

YESAYA 21 - Ngaju bible

YESAYA 21

¹Jetoh peteh tahiu Babel: Kilau auh riwut pusok kanyawung je manantengong mahalau padang pasir, kalote panumah calaka bara lewu je tamam.

²Aku mandino taloh paite tahiu kare kajadian je bakaike-ikeh; tahiu kadarhaka tuntang kabinasa. Miar, tantara Elam, sarang! O tantara Madai, kapong! Hatalla akan mahapus uras kare kapehe je iawi Babel.

³Taloh paite jete mawi aku ngodon sampai dia tau mite tuntang mahining tinai. Aku iamok kikeh tuntang kapehe, kilau ije oloh bawi je metohe luas anake.

⁴Ateiku balisah; angat je mangkarieng mawi aku hagenjeh. Alem je ientaiku baya mimbit kagenjeh.

⁵Aku mite kea panginan pesta je jari inatap; eka mondok akan kare oloh je irawei jari tatap. Ewen kuman tuntang mihop. Salenga tarahining parentah: “O perwira! Natap talawangm!”

⁶Palus TUHAN hamauh dengangku, “Keleh haguet andak ije oloh jaga tuntang soho ie malapor taloh je gitae.

⁷Amon ie mite pasukan bakuda dumah badue-badue, pasukan je mahapan kalidai tuntang onta, ie musti manantuanie bua-buah.”

⁸Limbah te oloh jaga te[31] mantehau, “Tuan, aku jari jaga genep andau handau hamalem.”

⁹ Item, te ie ewen! Pasukan bakuda je dumah hayak badue-badue. Limbah te oloh jaga te mangabar, “Babel jari manjato! Kare hampatong je inara ewen hancor kasaburan hong petak.”

¹⁰Bangsa aingku Israel! Ikau jari impijak-inandik tuntang ihunje-hunje kilau kare bawak gandom. Toh insanangku akam kabar bahalap je ihiningku bara TUHAN Je Jaton Tikas Kuasae, Hatallan Israel.

¹¹Jetoh peteh tahiu Edom. Aton oloh je mantehau Aku bara Edom, “O, oloh jaga, en magon tahi alem toh? Pire jam hindai harue hanjewu?”

¹²Tombah Aku, “Andau hanjewu akan dumah, tapi alem dumah kea. Amon handak misek, dumah ih tuntang isek tinai.”

¹³Jetoh peteh tahiu Arab: O, oloh Dedan, kare kapilah ayum bakemah intu rowut tanah Arab.

¹⁴O oloh lewu tanah Tema, pihop kare oloh je teah belai je manalih ikau, tuntang pakanan kare oloh je babuhau.

¹⁵Awi ewen jari hadari bara padang je inyilak, bara panah je inenan, tuntang bara parang je kanjerae hamok.

¹⁶Palus TUHAN hamauh dengangku, “Pas ije nyelo tinai, panatau kare suku Kedar akan lepah.

¹⁷Kare pamanah Kedar iete oloh je paling menteng. Tapi baya isut bewei bara ewen je akan salamat. Aku, TUHAN, Hatallan Israel, jari hakotak.”