Read Ngaju YESAYA 22 Bible Online

YESAYA 22 - Ngaju bible

YESAYA 22

¹Jetoh peteh tahiu Janah Taloh Paite: O, Oloh lewu Yerusalem, mbuhen keton uras mandai akan hunjun sapau huma?[32]

²Dia patut hapus lewu pesta tuntang basasurak hanjak. Awi kare pahlawan ayum je matei hong parang toh dia matei awi hakalahi.

³Uras kare pangkalima ayum hadari tuntang inawan helo bara ewen sampet mampalekas panah. Uras oloh abas ayum buah tawan kea aloh ewen jari hadari kejau.

⁴Ela manantuani aku; nauhe aku manatum kare oloh bara bangsa ayungku je jari matei. Ela nyalang mampong aku.

⁵Punae, TUHAN Je Pangkahai tuntang Je Jaton Tikas Kuasae jari manukas andau toh kilau andau karidu, kageger tuntang kalahi-kajama intu Janah Taloh Paite. Kare dinding lewu jari inderep. Auh kariak oloh balaku dohop tarahining hong kare bukit.

⁶Oloh Siria dumah hapan kuda tuntang kareta parang, oloh Elam mahapan sanjata panah, oloh Kir manatap talawange.

⁷Kare janah je basiwoh intu Yuda kontep awi kareta parang. Pasukan je mahapan kuda jari tatap hila baun kare lawang Yerusalem.

⁸Salepah eka manahan ain oloh Yuda baduroh. Katika te, keton mariksa kare pakakas parang intu gudang sanjata.

⁹Keton sondau are toto kadarak dinding lewu Yerusalem je patut ingambuah. Keton mariksa uras huma intu Yerusalem, mongkar pire-pire bara kare taloh te tuntang mahapan batue uka mangambuah dinding lewu. Akan hapa manampunan danum,

¹¹keton manampa talaga intu huang lewu tuntang manampunan danum bara talaga je helo. Tapi keton dia manantuani Hatalla je jari tahi marencana uras taloh te, tuntang je mambuku taloh te manjadi.

¹²Metoh te TUHAN Je Pangkahai tuntang Je Jaton Tikas Kuasae manyoho keton manangis tuntang manatum, manggunting balau tuntang mahapan tapih karong.

¹³ Tapi keton salenga hanja-hanjak tuntang pesta. Keton manyambalih sapi tuntang tabiri, kuman isin meto tuntang mihop danum anggor sambil mantehau “Keleh itah kuman tuntang mihop, awi jewu itah matei!”

¹⁴TUHAN Je Pangkahai tuntang Je Jaton Tikas Kuasae mamparahan Arep akangku tuntang hamauh, “Toto, kapapan ewen te dia akan iampung-Ku sampai ewen matei. Aku TUHAN, jari hakotak.”

¹⁵TUHAN Je Pangkahi tuntang Je Jaton Tikas Kuasae manyoho aku manyondau Sebna, kapala gawi huang istana, uka manyampai akae peteh TUHAN toh.

¹⁶“Ikau manyangka arepm toh eweh? Narai hak ayum sampai ikau mamahat kubur akan arepm intu bukit batu toh?

¹⁷Awas, aku handak manganan ikau keja-kejau. Ikau akan ingarakop-Ku tuntang imbalong-Ku palus inggaling-Ku kilau bal akan lewu je hai. Intu hete ikau akan matei intu balikat kare kareta je inaram. Ikau jari mamapa aran kaluarga tuan ayum.

¹⁹Awi te ikau akan impaterai-Ku bara gawim tuntang impamohong-Ku bara pangkatm je gantong.

²⁰Katika te aku akan mantehau rewar-Ku Elyakim anak Hilkia.

²¹Pakaian kahaim tuntang peteng kahangm akan ingkepang-Ku intu ie. Uras kare kuasam akan inenga-Ku akae. Ie akan manjadi bapa akan oloh lewu Yerusalem tuntang Yuda.

²² Ie akan mimbing salepah kuasa intu penda raja turonan Dawid. Ie akan mimbing kunci karajaan. Amon ie muap, maka jaton oloh je tau matep jete, tuntang amon ie matep jete, jaton oloh je tau muap jete.

²³Aku handak manenga akae eka mondok je dehen kilau pasak je imapak dehen intu dinding batu. Uras kare keluargae akan ihormat tagal ie.

²⁴Tapi tundah kolae tuntang tanggongae akan mambehat ie. Ewen akan masahan arepe dengae, kilau rinjing je barakuak intu pasak.

²⁵Amon jete manjadi, palus pasak je imapak dehen te balekak tuntang manjato. Jete kahapus tundah kolae tuntang uras oloh je mansahan arepe Akae. Aku, TUHAN, jari hakotak.”