Read Ngaju YESAYA 24 Bible Online

YESAYA 24 - Ngaju bible

YESAYA 24

¹TUHAN akan mambinasa petak toh, sampai jadi keang kamahau tuntang benyem. Ie akan manambalik jete tuntang mamisah-darai oloh lewue.

²Uras akan mangkeme kajarian pambelom je sama: kare imam tuntang rayat, rewar tuntang tempoe, je manjual tuntang je mamili, je minjam tuntang je mahanjaman, tatau tuntang je belom susah.

³Petak akan bakarak tuntang impahancor, TUHAN jari hakotak, tuntang taloh te pasti manjadi.

⁴Petak manjadi keang tuntang balayu, hapus kalunen manjadi asi-asi. Langit tuntang petak sama-sama karinge.

⁵Petak manjadi papa, awi oloh lewue malanggar kare parentah Hatalla, mobah kare auh tukas Aie tuntang manolak janji je jari inampa Awie dengan ewen palus katatahie.

⁶Awi te TUHAN jari manyapa petak tuntang mahukum oloh lewue awi gawin ewen. Ewen ingehu tuntang isut bewei bara ewen je salamat.

⁷Batang anggor balayu-halai tuntang danum anggor bahali dinon. Oloh je solake hanjak, toh kapehe atei.

⁸Dia tinai aton ihining auh kacapi je rami tuntang auh tarabang je habandam. Karamin oloh je hanjak rantang jari terai.

⁹Jaton tinai oloh je mihop anggor sambil manyanyi, tuntang jaton tinai oloh je mangkeme kamangat taloh ihop je bahari.

¹⁰Hapus lewu ridu: uras kare batonggang huma ingunci awi oloh huange mikeh.

¹¹Kare oloh mangkariak intu kare jalan awi lepah danum anggor. Jaton tinai kahanjak intu lewu te palus katatahie.

¹²Lewu jari ramok-rakai, tuntang kare lawange karak-karaka.

¹³Jete je akan manjadi hong hapus petak akan genep bangsa. Sama kilau te kea hong getem, metoh bua undus induan sampai lepah tuntang bua anggor je pangkarahiae imutik bara batange.

¹⁴Kare oloh je salamat akan manyanyi dengan kahanjak. Oloh je hila barat akan mambarita kahain TUHAN

¹⁵tuntang oloh hong timor akan manara arae. Oloh lewu hong saran tasik akan mampahai TUHAN, Hatallan Israel.

¹⁶Bara saran petak tarahining nyanyi tara akan Israel, bangsa je baketep manumon auh Hatalla. Tapi calaka aku! Aku paham asi-asi! Oloh darhaka magon kea mandarhaka tuntang sasar mandarhaka haream.

¹⁷Hining, o salepah oloh hong hunjun petak! Kageger, parangkep tuntang jarat mentai keton.

¹⁸Oloh je hadari bara kageger kareh manjato akan huang parangkep, tuntang oloh je liwus bara parangkep akan buah jarat. Ujan labat akan batusoh bara langit, tuntang galang petak akan hagolak.

¹⁹Petak badarak, ramok tuntang hongge.

²⁰Bal petak ruyong-rayang sama kilau oloh babusau, tuntang hongge kilau pasah awi riwut barat. Petak baderep awi ehat dosae. Ie hancor dia akan hingkat tinai.

²¹Metoh te TUHAN akan mahukum kare panguasa intu langit tuntang kare raja hong hunjun petak.

²²Ewen akan imumpong haya-hayak sama kilau oloh tawanan intu lowang. Ewen inamean akan penjara sampai dumah katikae buah hukum.

²³Bulan akan kaput tuntang matanandau dia tinai balawa, awi TUHAN Je Jaton Tikas Kuasae akan marentah kilau raja. Ie akan marentah intu Yerusalem, intu hunjun Bukit Sion. Ie mamparahan kahain Aie akan kare pamimpin ungkup Ayue.