Read Ngaju YESAYA 25 Bible Online

YESAYA 25 - Ngaju bible

YESAYA 25

¹TUHAN, Ikau Hatallangku, aku mampahai aran Aim tuntang inaraku aran Aim. Awi kare gawin Aim paham heran; Ikau marencana bara horan, tuntang malalus jete hapan kaketep.

²Lewu te jari ihancor Awim; lewu hakota te jari baderep. Istana je imangun oloh bangsa beken jari impalomos, tuntang dia imangun tinai palus katatahie.

³Ikau akan inara awi kare bangsa je abas, tuntang ingikeh intu kare lewun kare bangsa je tulas.

⁴Awi Ikau jadi eka babuhau akan oloh je balemo, eka je aman akan oloh susah je hong kajake. Ikau eka kalindong bara riwut barat, eka kanjungen bara lasut andau. Awi oloh je tulas manyarang kilau riwut barat hong wayah pangujan,[35]

⁵kilau riwut balasut intu petak je keang kamahau. Tapi Ikau mawi musoh ikei jungun, impaterai Awim auh kariak kare oloh je tulas, kilau kanjungen baunandau je mampanihau lasut andau.

⁶Intu bukit Sion TUHAN Je Jaton Tikas Kuasae akan manatap panginan pesta akan kakare bangsa hong hapus kalunen. Ie manyarongan panginan je paling mangat tuntang anggor je iintih.

⁷Intu hunjun bukit te Ie akan manganan baunandau kapehen atei je manyangkulep kare bangsa.

⁸ TUHAN Je Jaton Tikas Kuasae akan mambinasa pampatei palus katatahie! Ie akan mampuas danum mata bara genep baun oloh, tuntang mangejau kahawen je inanggong ungkup Ayue hong hapus petak. TUHAN jari hakotak, tuntang taloh te pasti manjadi.

⁹Intu katika te oloh akan hamauh, “Toto haliai, Ie te Hatallan itah; Ie je ientai itah, uka itah inyalamat. Toto haliai Ie toh TUHAN; Ie je ientai itah. Toh itah tau basasurak hanjak, awi Ie jari manyalamat itah.”

¹⁰ TUHAN akan mangalindong bukit Sion, tapi Moab akan ihunje kilau tampilai hong sarangan rotik.

¹¹Oloh lewue akan manjuju lengee kilau oloh je handak hanangoi. Tapi TUHAN akan mamparandah kajohon ewen sampai ewen jaton bara kaabas.

¹²Kare dinding kota lewu Moab je gantong akan impalongkang Awie tuntang injakah Awie akan petak sampai hancor sama kilau kawo.