Read Ngaju YESAYA 26 Bible Online

YESAYA 26 - Ngaju bible

YESAYA 26

¹Hong katika te oloh akan manyanyi nyanyi tara toh intu tanah Yuda: “Lalehan kadehee lewun itah; Hatalla kabuat je mamangun dinding kotae, intu hetoh itah salamat.

²Keleh muap kare lawang batonggang, uka tame kare bangsa je eter baketep, bangsa je malalus kahandak Hatallae.

³TUHAN, Ikau manenga kasanang tuntang kamangat akan oloh je tanggar ateie, awi ie percaya Dengam.

⁴Keleh percaya harajur dengan TUHAN, awi TUHAN, Hatalla, harajur mangalindong itah.

⁵TUHAN mamparandah oloh bajoho; Ie mampahancor lewu hadinding kota ain ewen, tuntang mamparatae sampai petak.

⁶Kare oloh je belom susah tuntang je belom kapehe akan maninjak-manandik jete.”

⁷Oloh bujur mananjong intu jalan je bujur, basa Ikau, TUHAN, marintis jalan akae.

⁸Ikei omba auh tukas aim, o TUHAN, tuntang enta-entai Dengam. Ikau bewei je eka tara tuntang kataharun atei ikei.

⁹Hambaruangku taharu Dengam katika hamalem, ateiku manggau Ikau hong katika hanjewu. Amon Ikau kareh mahakim oloh hunjun petak, oloh hong kalunen akan mangatawan taloh je bujur toto.

¹⁰Aloh oloh papa inarima dengan bahalap, ie dia kea bajar taloh je bujur. Intu lewun oloh je mahaga parentah ie kea mawi taloh je mahiwang, tuntang dia maku mangaku kuasan TUHAN.

¹¹ TUHAN, Ikau tatap mahukum musoh Aim, tapi ewen dia mangatawae. Keleh ewen mahamen dahe-dahei mite sintam dengan ungkup Ayum. Keleh ewen lepah lingis awi hukuman je inatap Awim akan ewen.

¹²TUHAN, Ikau akan mawi ikei sanang; uras taloh je iawi ikei, Ikau wei je malaluse akan ikei.[36]

¹³Ikei puji inguasa awi kare tuan beken, tapi baya Ikau bewei je ingaku ikei, o TUHAN, Hatallan ikei!

¹⁴Ewen jari matei tuntang dia akan belom tinai, liaue dia akan misik haluli. Awi ewen jari lepah imbinasa Awim tuntang inganan Awim bara pangingat.

¹⁵Ikau jari mawi ikei ungkup Ayum dahang-dahanga, o TUHAN, tuntang mampalombah wilayah ikei, awi te Ikau impahai.

¹⁶Ikau jari mahukum ikei; hong kajake ikei mules haluli talih Ikau, tuntang balakudoa intu Ikau, o TUHAN.[37]

¹⁷Kilau oloh bawi je handak luas mangaliat tuntang mangkariak awi kapehe, kalote kea ikei intu taharep Aim, o TUHAN.

¹⁸Ikei batihi tuntang mangaliat kapehe, tapi dia manak taloh en-en; ikei dia manenga salamat akan kalunen, dia kea mandahang kare oloh je melai huange.[38]

¹⁹Ungkup Ayum je jari matei akan belom haluli, kare hantun ewen akan misik tinai. Oloh je jari ingubur intu penda petak akan misik tuntang basasurak. Kilau ambon je mampangat petak, Ikau mambelom ungkup Ayum je jari tahi matei.

²⁰Keleh tame akan huang humam, o bangsa ayungku, palus atep batonggang. Keleh manyahokan arepm pandehan sampai katikae kasangit TUHAN jari taduh.

²¹TUHAN akan mohon bara ekae melai hong sorga, akan mahukum kare oloh je melai hunjun petak awi kare dosan ewen. Gawin puno je ilalus ewen benye-benyem akan ingatawan. Petak dia tinai mambenyem arepe akan oloh je buah patei awi oloh beken.