Read Ngaju YESAYA 28 Bible Online

YESAYA 28 - Ngaju bible

YESAYA 28

¹Calaka lewu je eka katamam kare oloh pambusau intu Israel! Kabungase harenep kilau tampong kambang je balayu intu hunjun takolok ewen. Calaka lewu je hapanjong gantong intu bentok petak je basiwoh, je impatamam awi kare oloh je babusau sampai handak matei.

²TUHAN akan manyoho oloh je gancang tuntang menteng. Pandumahe kilau riwut barat impahayak ujan es, kilau ujan labat tuntang danum soho je mampahantong. Hapan kakaras ie mahampas ewen akan petak.

³Katamam kare pamimpin je babusau te akan ininjak-nandik.

⁴Tarong saritan lewun ewen je nampara harenep te akan lilap. Kajarian ewen kilau kajarian bua sikon je masak helo bara wayahe; sana gitan, balalu imutik tuntang kinan.

⁵TUHAN Je Jaton Tikas Kuasae akan manjadi tampong kambang je bungas akan tisan ungkup Ayue.

⁶TUHAN akan manenga pangkeme je bujur adil akan kare hakim, tuntang kahanyi akan kare oloh je nguan gawi manjaga lewu bara gawin asang.

⁷Kea kare nabi tuntang imam babusau awi tapalalau are mihop anggor tuntang arak. Ewen mananjong ruyong-rayang tuntang tantarang awi tirok pikir ewen deroh. Kare nabi dia olih tinai harati kare paite je inenga Hatalla akan ewen. Kare imam dia olih tinai mamutus kare pakara je iimbit manalih ewen.

⁸Mejan ewen kontep awi uta, sampai jaton samasinde eka je barasih tinai.

⁹Ewen bakotok tahiu aku, koae “Ie mangira ie te majar eweh? Eweh kea je perlu taloh je inarange? Ie manyangka itah toh anak korik je harue malekak tuso?

¹⁰Lalehan ie majar itah bara hurup ije akan hurup je beken, bara auh ije akan auh je beken, bara kalimat ije akan kalimat je beken.”

¹¹ Amon keton dia maku mahining auhku, TUHAN akan manyoho oloh bangsa beken uka majar keton hapan basa je ganjil tuntang beke-beken auhe.

¹²TUHAN maninjok ije eka akan eka malayan kaheka akan keton samandiai, tapi keton dia handak mahining auh Ayue.

¹³Tagal te TUHAN majar keton bara hurup ije akan hurup je beken, bara auh ije akan auh je beken, bara kalimat ije akan kalimat je beken. Tuntang katika mananjong keton lawo mantangah sampai buah himang, buah jarat tuntang buah tawan.

¹⁴Hining taloh je insanan TUHAN, o kare panawah je marentah rayat intu Yerusalem!

¹⁵Keton hamauh je keton jari mawi janji dengan pampatei tuntang jari mawi kapakat dengan oloh matei. Keton mangkeme pasti iete calaka je akan dumah te dia akan buah bitin keton awi keton mahapan tipu akan mangalindong arep keton.

¹⁶ Tagal te, TUHAN Je Pangkahai hamauh kalotoh, “Aku akan mandak galang je dehen intu Sion; ije batu panjeop puting je barega tuntang basurat: ‘Eweh je percaya dehen dia akan manyarah kalah’.

¹⁷Kabujur tuntang kaadilan handak iawiku jadi tali ukur, tuntang tali sipat.” Ujan batu akan mamapas lingis kakare tanjaro je impatamam keton. Danum soho akan mampahantong eka keton manyahokan.

¹⁸Janjin keton dengan pampatei tuntang kapakat keton dengan oloh matei akan imbalang, sampai amon calaka dumah, keton lepah buah kijak-ihik.

¹⁹Keton akan buah sial raju-rajur tuntang musti mananggong jete genep andau, hanjewu, bentok andau, tuntang hamalem. Keton akan hagenjeh mikeh amon keton harati peteh Hatalla.

²⁰Keton kilau oloh je handak batiroh intu ranjang je tapas kapanjange akan eka mambujur biti. Kahowute tapas kalombahe akan hapa mangahowut arep keton.

²¹ TUHAN akan harikas kilau intu bukit Perasim. Ie akan hakalahi kilau intu Janah Gibeon uka malalus kahandak Ayue, je mampahengan olon! Ie akan malalus gawin Aie je heran.

²²Aku jari mahining auh putusan Hatalla Je Pangkahai tuntang Je Jaton Tikas Kuasae akan mambinasa kakare lewu. Ela manyalan kare tingak je inyampaiku toh. Kareh labih bahali akan keton tau mandohop arep keton!

²³Keleh hining kare auhku, seneh auh petehku.

²⁴Ije biti oloh pamalan dia raju-rajur maluku, mancangkul tuntang manyarak petake akan ekae mimbul taloh.

²⁵Amon petake te jari tatap, ie manawor binyi, kilau paribasae katumbar tuntang jintan. Ie mimbul due macam gandom pihi-pihit, tuntang intu sarae taloh imbul beken.[42]

²⁶Ie katawan cara nguae, awi jari iajar Hatallae.

²⁷Ie dia mahapan pamipis babehat hapa mamipis katumbar atawa roda garobak akan manggiling jintan babilem atawa roda garobak hapa manggiling jintan baputi. Tapi ie mahapan sokah je mahian.

²⁸Metoh mihik gandom ie dia tempee raju-rajur sampai rotek. Dia! Ie katawan cara mihik je buah dengan mandai kareta intu hunjue dia sampai mamparotek kare bawak gandom te.

²⁹Kapintar-kaharati te panumahe bara TUHAN Je jaton tikas kausae. Kare rencana TUHAN uras pintar-harati tuntang harajur bahasil.