Read Ngaju YESAYA 29 Bible Online

YESAYA 29 - Ngaju bible

YESAYA 29

¹Calaka lewu Yerusalem je inyewut mesbeh ain Hatalla! Calaka lewu eka Dawid bakemah! Keleh kare nyelo-bulan haganti-gilir mahalau dengan kare gawie mahaga pestae.

²Tapi Hatalla akan mawi calaka akan lewu te, sampai oloh manarahing tuntang hakayah. Hapus lewu kilau mesbeh je halumor daha.

³Hatalla akan manyarang lewu te tuntang mangaponge bara kare serok sarae.

⁴Yerusalem kilau kambe je handak mantehau tuntang mampalua auhe bara penda petak, auh je huno-hunom bara huang kawo.

⁵Tapi uras kare oloh bangsa beken je tulas te akan nihau kilau kawo atawa bulu je inamput riwut manyalenga tuntang dia inyangka.

⁶TUHAN Je Jaton Tikas Kuasae akan mambebas lewu te hapan riwut barat tuntang petak hagerek paham. Ie akan mawi riwut barat tuntang apui je mamok.

⁷Palus kakare tantara ain bangsa beken je manyarang Yerusalem, lewu mesbeh ain Hatalla, uras oloh je mangapong tuntang manampur lewu te, akan nihau kilau nupi hong hamalem.

⁸Kare bangsa je hapumpong handak manyarang Yerusalem akan sama kilau oloh balau meher je nupi katika ie magon kuman, palus misik marak kanaie buang; atawa kilau oloh teah belai je nupi katika ie magon mihop, palus misik marak balengkonge magon teah.

⁹Keleh harajur kilau oloh heran tuntang mangambutep mate kilau oloh babute! Keleh babusau, tapi dia awi mihop anggor. Keleh mananjong ruyong-rayang, tapi dia awi mihop arak.

¹⁰ TUHAN mawi keton mangantok tuntang batiroh nyanyak. Ie manutup matan kare nabi tuntang manutup baun kare oloh panujum.

¹¹Riman genep taloh paite akan inyahokan bara keton, kilau buku je inyegel. Amon buku te imbit akan ije biti oloh je tau mambasa mangat ie mambasa jete akam, ia akan hamauh je ie dia tau, awi buku te inyegel.

¹²Amon buku te iimbit akan oloh je buta hurup, ie akan tombah je ie dia tau mambasa.

¹³ TUHAN hamauh, “Kare oloh te baya manyembah Aku hapan auhe, tapi atei ewen kejau bara Aku. Agaman ewen baya atoran olon je ihapal.

¹⁴ Awi te ewen akan inareweng-Ku hapan pukul-jara bewe-bewei. Oloh je pintar-harati akan manjadi humong, tuntang uras kare kapintar ewen te akan jaton gunae.”

¹⁵Calaka oloh je handak manyahokan rencanae bara TUHAN! Ewen nguan gawie benye-benyem, tuntang mangira jaton ije oloh je mite ewen atawa je katawan taloh je iawi ewen.

¹⁶ Uras te inambalik-nambalika ewen. Kueh je labih mambatang, tukang balanai atawa petak liat? En tau je inampa hamauh dengan je manampae, “Dia ie ikau je manampa aku”? Atawa en tau ramoe te hamauh dengae, “Ikau dia tau nguan taloh en-en”?

¹⁷Aton paribasa je auhe, “Dia tahi tinai himba jadi petak tana, tuntang petak tana haluli jadi himba.”

¹⁸Metoh te oloh badengen akan tau mahining kare auh bara ije buku je imbasa oloh akae, tuntang oloh babute je solake belom hong kakaput akan tau mite.

¹⁹Kare oloh je belom susah tuntang naniha akan mangkeme kasanang je inenga Hatalla je Barasih ain Israel.

²⁰Jete kahapus pambelom oloh je mangapehe oloh beken tuntang manawah Hatalla. Hatalla akan mambinasa uras kare oloh badosa,

²¹oloh je rajin mamapa oloh beken, oloh je mangahana oloh papa ihukum, tuntang oloh je mambarita kare sarita tanjaro uka oloh bujur dia mandino kaadilan.

²²Awi te TUHAN, Hatallan Israel je mambebas Abraham, toh hamauh, “Bangsa aing-Ku, keton dia akan inawah tinai tuntang baun keton dia akan kalas-mucat tinai awi mahamen.

²³Awi Amon ikau mite kare anakm je inenga-Ku akam, palus ikau akan mangaku je Aku Hatallan Karasih Israel. Ikau akan mahormat Aku tuntang mikeh intu taharep-Ku.

²⁴Oloh humong akan bajar harati tuntang oloh je harajur bakotok akan rajin iajar.”