Read Ngaju YESAYA 3 Bible Online

YESAYA 3 - Ngaju bible

YESAYA 3

¹Toto haliai, TUHAN Je Jaton Tikas Kuasae akan manduan bara Yerusalem kare taloh kinan tuntang taloh ihop. Kea kare taloh je iandal ewen:

²kare pahlawan tuntang tantara, hakim, nabi, panujum tuntang panasehat,

³perwira, oloh hai tuntang pamimpin, tukang sihir tuntang dukun.

⁴TUHAN akan mangkat kare anak tabela jadi pamimpin rayat, tuntang ewen akan marentah mana koae ih.

⁵Kare oloh akan hakapehe sama arepe. Oloh tabela manawah oloh bakas, tuntang oloh korik manawah oloh hai.

⁶Katika te oloh akan manunjok tundah paharie tuntang hamauh dengae, “Baya ikau wei je aton pakaian je bahalap, awi te, keleh ikau jadi pamimpin ikei intu jaman je kontep kasusah toh”.

⁷Tapi ie akan tombah, “Aku dia dukun! Aku kea jaton mingkes panginan tuntang pakaian. Ela manyoho aku jadi pamimpin bangsa!”

⁸Toto, Yerusalem jari manjato! Yuda jari baduroh! Awi kare kotak tuntang gawin ewen malawan TUHAN tuntang malawan kuasan Ayue.

⁹Ampin ewen je bajoho mamparahan kapapan ewen. Tara-tarang ewen badosa kilau Sodom intu jaman horan. Calaka ewen! Ewen mawi calaka akan arep ewen kabuat.

¹⁰TUHAN hamauh, “Sanan akan oloh je manumon auh-Ku, ewen te akan sanang tuntang salamat. Ewen akan mangkeme hasil kahekae.

¹¹Tapi calaka akan oloh papa! Ewen akan iawi kilau ewen jari mawi oloh beken.

¹²Ungkup-Ku akan ingapehe awi tukang pamanak duit tuntang inyop awi lamantek je mihop daha. Ungkup-Ku impalayang awi kare pamimpie sampai dia katawan tinai jalan je musti ihoroi ewen.”

¹³TUHAN jari tatap uka mandawa tuntang mahakim ungkup Ayue.[5]

¹⁴TUHAN jadi hakim akan kare pamimpin ungkup Ayue. Jetoh dawan TUHAN dengan ewen: “Keton je marampok hasil kare kabon anggor; human keton kontep awi kare ramo je induan keton bara oloh je belom susah.

¹⁵Mbuhen keton mangapehe ungkup-Ku tuntang marampas ramon oloh je belom susah? Aku, TUHAN je pangkahai tuntang Je Jaton Tikas Kuasae jari hakotak.”

¹⁶TUHAN hamauh, “Bajoho toto kare bawin oloh Yerusalem! Ewen bujo-bujok, rajin mambirep matae, mananjong hapan kajohoe. Ingkang paie nampa-nampae, tuntang hakariring kare auh galang paie.

¹⁷Tapi Aku akan mahukum ewen; takolok ewen akan kontep awi kerai tuntang inggunting sampai haborang.”

¹⁸Akan sampai katikae TUHAN manduan bara kare bawin oloh Yerusalem kare ramo hiasan je inara ewen: peteng takolok, galang pai, rantai,

¹⁹galang lenge, sandurong,

²⁰tutop takolok, kare karohei intu lengee tuntang kahange,

²¹tisin, tuntang sowang uronge,

²²pakaian pesta je bahala-halap, kampuh, epok,

²³baju banipis, pakaian lena, peteng uyat tuntang sandurong panjang.

²⁴Katika toh ewen mahapan minyak harum je mangat ewaue, tapi kareh ewen akan ewau maram. Panding ewen je lamos akan ingganti hapan talin pasung je kasar. Takolok ewen je habalau bahalap akan imborang. Pakaian ewen je bahala-halap akan ingganti hapan je kupit. Toh ewen bahalap; kareh baun ewen akan maram awi inenga cap.

²⁵Oloh hatue ain ewen je aba-abas, akan matei intu parang.

²⁶Intu kare lawang lewu oloh akan manatum tuntang manangis, tuntang lewu te kabuat akan kilau oloh bawi je impalowai je mondok intu petak.