Read Ngaju YESAYA 30 Bible Online

YESAYA 30 - Ngaju bible

YESAYA 30

¹TUHAN hamauh, “Calaka kare pamimpin Yuda, awi ewen mandarhaka intu taharep-Ku. Ewen omba kare rencana je dia irencana awi-Ku. Ewen maneken janji je hakalawan dengan kahandak ayung-Ku. Palus dosan ewen hatuyok.

²Ewen haguet akan Misir jaton balaku kaputusan bara Aku. Ewen bakalindong dengan Misir tuntang maharap pandohop raja Misir.

³Tapi raja te akan mangacewa ewen, tuntang kalindong je iharap bara Misir akan imbalang.

⁴Aloh kare sarohan Yuda jari sampai intu lewu Soan tuntang Hanes intu Misir,

⁵samandiai oloh akan mahamen awi jari mampaandal bangsa je dia baguna akan ewen. Taloh je dinon ewen dia kaontong atawa pandohop, malengkan kahawen.”

⁶Kalotoh peteh TUHAN tahiu kare meto je melai tanah salatan, “Kare sarohan mamuat akan hunjun kalidai tuntang hunjun onta ain ewen hapan kare panenga, palus mahalau daerah je kontep bahaya je ielai awi singa, handipe tada tuntang naga je tege palapase. Kare panenga te iagah ewen akan ije bangsa je dia olih mandohop ewen.

⁷Pandohop Misir ngahus bewei. Awi te Misir inenga-Ku galar, ‘Naga je dia bahaya’.”

⁸Hatalla manyoho aku mancatet kapapan ungkup Ayue intu ije buku kilau akan pampingat sampai katatahie.

⁹Awi, ewen te bangsa je rajin mandarhaka intu taharep Hatalla. Ewen rajin mananjaro tuntang dia puji handak mahining auh ajar TUHAN.

¹⁰Ewen hamauh dengan kare nabi, “Nyombel nyamam! Ela mansanan akan ikei taloh je toto, tapi baya taloh je handak ihining ikei ih. Nauhe ikei tetep manggau nupi.

¹¹Keleh manyare arepm tuntang horoi jalan beken. Ela manderoh ikei dengan Hatallan karasih Israel.”

¹²Awi te Hatallan karasih Israel hamauh kalotoh, “Keton manolak auh-Ku tuntang mampatamam gawi mangapehe oloh tuntang manipu.

¹³Awi te keton sala. Keton kilau dinding gantong je badarak bara hunjun akan penda; keton akan balongkang nyalenga.

¹⁴Keton akan ramok kilau balanai petak je darai; sampai bara marak kare kiwake je ramok te ije mahin jaton je tau ihapan uka manduan barah bara tungku atawa uka manimba danum bara huang bak.”

¹⁵TUHAN Je Pangkahai, Hatallan karasih Israel, hamauh dengan ungkup Ayue, “Keleh hobah tuntang tetep tanggar atei, maka keton akan inyalamat awi-Ku. Keleh percaya intu Aku hapan atei je tanggar, maka Aku akan mampaabas keton.” Tapi keton dia maku!

¹⁶Keton mawi rencana haream akan hadari bara musoh awi keton manongkang kuda je balias hadari. Bujur! Punae keton kareh musti hadari! Keton manirok kuda ain keton te puna sukup kakancange hadari, padahal kare oloh je manggoang keton labih kancang darie.

¹⁷Sakoyan biti akan hadari mite ancaman ije biti musoh. Ancaman lime biti mawi keton lepah uras hadari. Bara kare tantara ain keton baya aton balihi ije tihang bandera ih intu hunjun bukit.

¹⁸Aloh kalote, TUHAN magon enta-entai katikae uka mamparahan sinta asi akan keton. Ie tatap akan masi keton. Awi TUHAN te Hatalla je malalus taloh je buah. Salamat oloh je harap Ie.

¹⁹O keton je melai hong Yerusalem, keton dia akan harajur manangis. TUHAN masi, tuntang bajeleng tombah auh keton amon keton mantehau tuntang balaku dohop intu Ie.

²⁰TUHAN manenga akan keton wayah je babehat hapa mariksa tuntang majar keton. Tapi toh Ie kabuat mampahayak keton sampai keton mangkeme Ie aton marak keton.

²¹Amon keton mahiwang bara jalan, intu hila likut keton akan ihining auh Ayue je hamauh, “Jetoh ie jalae; keleh manyak jalan toh.”

²²Kare hampatong dewam je ingalukop hapan perak tuntang amas akan inganan keton kilau taloh papa, sambil hamauh, “Dari bara aku!”

²³Amon keton manawor binyi, TUHAN akan mawi ujan mangat binyi te mampalembut hasil getem je hakutoh karee. Akan meto ain keton akan inyadia padang oru je lombah.

²⁴Sapi hatue tuntang kalidai je maluku tanan keton akan kuman panginan meto je paling bahalap je tantai inyadia akan jete.

²⁵Hong andau kare kota ain musohm ingapong tuntang kare oloe impatei, bara genep bukit tuntang lungkoh akan mahasor kare anak sungei.

²⁶Bulan akan balawa kilau kalawan matanandau. Matanandau akan uju lipet labih balawa bara bahut, kilau kalawan uju andau imumpong jadi ije. Uras taloh te akan manjadi katika TUHAN akan mameteng tuntang mampakeleh kare himang ungkup Ayue je jari imukul-injara Awie.

²⁷Kuasa tuntang kahain TUHAN gitan bara kejau. Apui tuntang asep mamparahan kasangit Aie. Ie hakotak dengan ewen, tuntang kare auh Aie mangehu sama kilau apui.

²⁸Ie manyoho riwut helo bara Ie kilau danum soho je nyira uyat je mampahantong taloh handiai. Ie mambinasa kare bangsa, tuntang mambalang kare rencana ewen je papa.

²⁹Tapi keton ungkup Hatalla, akan hanjak tuntang manyanyi sama kilau hong pesta agama. Keton akan rami-rami sama kilau oloh je mananjong impahayak auh suling manintu Human TUHAN, pandohop Israel.

³⁰TUHAN akan mampalua auh Ayue je hai uka ihining, tuntang genep bitin oloh akan mangkeme kuasan Aie je tamam. Kasangit Ayue akan mampalembut apui je mangehu, ujan labat, ujan batu tuntang riwut barat.

³¹Oloh Asur akan geger amon mahining auh TUHAN tuntang mangkeme hukuman Aie je babehat.

³²Pandehan ewen mangkeme kare pukul-jara bara Ie, ungkup Hatalla barami-rami hapan auh musik gandang tuntang kacapi. Hatalla kabuat akan parang malawan oloh Asur.

³³Bara horan jari inyadia eka uka mamapui raja Asur. Eka te handalem tuntang lombah, basuang pandok apui je kilau pehon. TUHAN akan manutonge tuntang mahimon tahaseng Ayue sama kilau sungei barirang.