Read Ngaju YESAYA 31 Bible Online

YESAYA 31 - Ngaju bible

YESAYA 31

¹Calaka oloh je haguet akan Misir awi handak balaku pandohop! Ewen mampaandal kaabas tantara parang Misir dengan pasukan je manongkang kuda tuntang kudae je aba-abas hayak karetae je are. Tapi ewen dia percaya dengan TUHAN, Hatallan karasih Israel tuntang dia balaku pandohope.

²TUHAN pintar-harati tuntang katawan taloh je ilaluse. Ie mampadumah calaka tuntang malalus ancaman Aie uka mahukum oloh papa tuntang oloh je mandohop oloh papa.

³Misir te baya olon, dia ie Hatalla. Kuda ain ewen te baya taloh belom bewei jaton sipat je kilau hatalla. Amon TUHAN mawi, bangsa pandohop te akan tantarang tuntang bangsa je indohope akan balongkang. Palus kadadauee te akan binasa.

⁴TUHAN hamauh dengangku, “Sama kilau singa mangareheng awie bele oloh manduan taloh kinae tuntang dia olih impikeh hapan auh kariak atawa tambawai ije kakawan sakatik je dumah malawan ie, kalote kea Aku akan parang tuntang manahan Bukit Sion,

⁵Sama kilau ije kongan burong je kipa-kipak intu hunjun sarangae uka mangalindong kare anake, kalote kea Aku, TUHAN Je Jaton Tikas Kuasae akan mangalindong, mandohop tuntang manyalamat Yerusalem.”

⁶TUHAN hamauh, “Bangsa Israel, ikau jari malawan Aku tuntang badosa intu taharep-Ku. Tapi toh keleh haluli talih Aku!

⁷Akan sampai katikae uras kare keton manganan kare hampatong dewa je bara perak tuntang amas je inampa keton kabuat hapan kakare dosan keton.

⁸Asur akan imbinasa intu parang, tapi dia awi kaabas olon. Oloh Asur akan hadari bara eka parang, tuntang kare oloh tabela ain ewen akan manjadi jipen.

⁹Rajan ewen akan hadari awie mikeh, tuntang kare perwirae paham tarewen, sampai kare bandera parang ewen ilihie kakai bewei.” TUHAN jari hakotak, TUHAN je inyembah tuntang ihormat hapan parapah je ingehu intu Yerusalem.