Read Ngaju YESAYA 32 Bible Online

YESAYA 32 - Ngaju bible

YESAYA 32

¹Ite, akan sampai katikae ije biti raja akan marentah hapan kaadil tuntang kare pamimpin bangsa malalus taloh je bujur.

²Genep bitin ewen sama kilau eka bakalindong bara riwut barat. Genep bitin ewen sama kilau batang danum je mahasor intu padang pasir, sama kilau kanjungen batu je hai intu petak talampas.

³Oloh je tau mite dia akan mangambutep matae, tuntang oloh je tau mahining akan manyeneh.

⁴Oloh je solake kajeng-kiso, akan malalus taloh gawie hapan kasabar tuntang salepah kaharati. Oloh je aga akan hakotak tarang.

⁵Oloh humong dia tinai ianggap je ihormat, tuntang oloh panipu dia inyewut bujur ateie.

⁶Oloh humong manyewut kare auh kahumong tuntang marencana taloh je papa. En bewei taloh je ilaluse tuntang inyewute uras te hapae manawah Hatalla. Dia puji ie mampakanan oloh balau atawa mampihop oloh je teah belaie.

⁷Tapi oloh panipu manirok tuntang malalus taloh je papa. Ie manggau akal uka mancalaka oloh je belom susah hapan kare auh tanjaro tuntang mangahana ewen mandino hak ewen.

⁸Tapi oloh je tinduh marencana taloh je tinduh tuntang malalus taloh je tinduh kea.

⁹Hining, o kare oloh bawi je belom mangat, je kejau bara kasusah!

¹⁰Metoh toh keton tau mangkeme sanang, tapi lakau ije nyelo tinai keton akan bageto kaharap, awi taloh je inggetem bara batang anggor akan basial tuntang hasil petak je beken kea mahin jaton.

¹¹Sampai katika toh keton belom mangat, kejau bara kasusah. Tapi toh, keleh keton hagenjeh tuntang mikeh! Engkak pakaian keton tuntang kepan tapih karong intu kahang keton.

¹²Keleh manatum kare tanan keton je bajewong tuntang kare kabon anggor keton je mamua labat.

¹³Awi petak bangsa ayung-Ku inumbo awi sahep tuntang rowut haduhi. Yoh, keleh manangis tagal kare human keton je eka oloh hanja-hanjak tuntang lewu je kontep awi karami.

¹⁴Istana mahin akan ilihi, tuntang lewu je rami tuntang mambatang akan manjadi lewu je suni benyem. Bukit tuntang kare candi jaga jari imparata dengan petak palus katatahie. Kare kalidai baliar tuntang kare tabiri akan hanjak murep oru intu hete.

¹⁵Tapi sinde tinai Hatalla akan dumah hapan kuasan Aie. Palus padang pasir akan manjadi eka kare oloh malan tuntang nguan pambolan je bajewong, tuntang kare tana akan manjadi sama kilau parak kayu.

¹⁶Hong hapus lewu akan aton kabujur tuntang kaadilan.

¹⁷Gagenep bitin oloh akan malalus taloh je bujur, sampai aton kasanang tuntang kadamai je katatahie.

¹⁸Ungkup Hatalla akan lapas bara kasusah tuntang belom huang eka je sanang tuntang mangat.

¹⁹Lalehan kasanang kakare keton handiai, awi ain keton aton sukup danum akan pambolan keton, tuntang meto ain keton tau murep oru intu hete-hete dengan kasanang. Tapi musoh keton akan sama kilau parak kayu je intakan ujan batu tuntang lewun ewen akan induroh.