Read Ngaju YESAYA 33 Bible Online

YESAYA 33 - Ngaju bible

YESAYA 33

¹Calaka kare musoh itah! Ewen marampok aloh ewen dia irampok, tuntang mandarhaka aloh ewen dia indarhaka. Tapi limbah marampok tuntang mandarhaka, ewen kabuat akan manjadi korban rampok tuntang kadarhaka.

²O TUHAN, pasi ikei. Ikau wei je eka kaharap ikei. Keleh mangalindong ikei genep andau. Tuntang nyalamat ikei bara wayah kajake.

³Amon ikau harikas tuntang hakotak hapan auh je mangguroh, kare bangsa akan hadari tuntang pisah darai.

⁴Sama kilau kawan sangkalap oloh manyarang tuntang marampok panatau ewen.

⁵TUHAN paham barasih-kahai; Ie manguasa taloh samandiai. Ie akan mahaga parentah tuntang kaadilan intu Yerusalem.

⁶Tuntang manenga kasanang akan ungkup Ayue. Panatau je manyalamat ewen iete kapintar tuntang kaharati hayak hormat akan TUHAN.

⁷Kare oloh je mamot menteng mangkariak balaku dohop; kare sarohan je mimbit kadamai managis kapehe atei.

⁸Kare jalan je hai paham bahaya sampai manjadi benyem; jaton ije oloh je mahalaue. Kare janji iungkir tuntang kapakat inolak. Jaton tinai je inumon, aloh ije.

⁹Lewu huma uras ilihi sampai tunis benyem. Kare parak kayu Libanon balayu; Janah Saron je basiwoh jadi sama kilau padang pasir. Intu Basan tuntang intu bukit Karmel kare dawen baduroh.

¹⁰TUHAN hamauh dengan bangsa te, “Toh Aku handak harikas tuntang mamparahan kuasang-Ku.

¹¹Rencana keton uras hayang tuntang kare taloh je ilalus keton hayang urase. Kasangit keton kilau apui je mangehu arep keton kabuat.

¹²Keton sama kilau batu karang je imapui akan hapa manampa kapur; sama kilau parak duhi je ineweng tuntang ingehu huang apui.

¹³Keleh uras kare oloh je tokep tuntang kejau mahining tahiu gawing-Ku tuntang mangaku kuasang-Ku.”

¹⁴Kare oloh badosa intu Sion keleh hagenjeh mikeh. Koan ewen, “Putusan Hatalla sama kilau apui je hanyala palus katatahie. En tau aton oloh je tahan huang apui je bakamatei te?”

¹⁵Keton tau tahan amon keton hakotak tuntang malalus taloh je bujur. Ela manggau ontong hapan gawi je baya mangapehe oloh je belom susah. Ela manarima duit sogok. Ela omba oloh je marencana mampatei oloh atawa kapapa beken.

¹⁶Maka keton akan ingalindong tuntang belom sanang, sama kilau oloh je melai huang kota je dehen. Panginan tuntang taloh ihop akan inyadia akan keton.

¹⁷Akan sampai katikae keton mite ije biti raja je marentah huang kahaie intu lewu je hambirang lombah akan hila kare eka je hakaliling.

¹⁸Kikeh keton dengan kare panagih pajak, kare pajabat tuntang kare oloh bangsa beken je helo te baya akan manjadi kakenang atei bewei.

¹⁹Keton dia tinai mite kare oloh bangsa beken je kurang ajar je hakotak hapan basa je dia keton kasenee.

²⁰Keleh manampayah lewu Sion, eka itah mahaga kare pesta agama. Tampayah Yerusalem! Lalehan kamangat eka te akan eka melai, kilau kemah je dia puji iindah, pasake dia puji injawut tuntang talie dia puji bageto.

²¹TUHAN akan mamparahan kahain Aie akan itah. Itah akan belom intu saran sungei je lombah, je dia olih ihoroi kapal musoh.[43]

²²Kare pakakas je aton intu huang kapal ewen uras jaton gunae; kare benang layare dia tau ingancang! Uras panatau tantara ain musoh akan induan itah. Panatau te paham are, sampai oloh je lumpuh mahin dinon bagi. TUHAN kabuat akan jadi rajan itah; Ie akan marentah, mahaga parentah tuntang manyalamat itah bara musoh.

²⁴Ije mahin jaton oloh je melai hong lewun itah akan manarahing awi haban, tuntang uras kare dosa akan iampun.