Read Ngaju YESAYA 34 Bible Online

YESAYA 34 - Ngaju bible

YESAYA 34

¹Ayo hapumpong, o kare bangsa, tuntang hining. Keleh hapus kalunen tuntang kare taloh je belom intu huange dumah tuntang mahining.

²TUHAN sangit dengan kakare bangsa tuntang dengan salepah tantara ain ewen.

³Kare hantun ewen dia akan ingubur, tapi inalua bewei maram tuntang bahewau. Kare bukit akan bahandang awi ihasor dahan ewen.

⁴ Matanandau, bulan tuntang bintang akan lenyoh. Langit akan imbalon kilau balon karatas. Kare bintang akan baduroh kilau kare dawen je baduroh bara batange.

⁵ TUHAN jari manyadia padang intu sorga, tuntang toh padang te akan mawi bangsa Edom je jari ihukum tuntang akan imbinasa.

⁶Padang TUHAN akan halumor daha tuntang kontep dengan enyak ewen, sama kilau daha tuntang enyak meto je inyambalih akan parapah. Basa TUHAN manatap parapah intu Bosra, tuntang mawi asang intu tanah Edom.

⁷Kare oloh akan matei sama kilau sapi baliar tuntang sapi tabela. Lewun ewen akan manjadi bahandang awi daha tuntang kontep dengan enyak.

⁸Jete katikae TUHAN milang Sion tuntang mambaleh gawin kare musohe.

⁹Kare Sungei hong tanah Edom akan hobah jadi ter tuntang petake jadi barirang. Kajariae hapus lewu manjadi hanyala sama kilau ter.

¹⁰ Handau hamalem nyala te dia belep, tuntang asep mangangkewol bara hete sampai katatahie. Petak te akan ilihi buang tuntang keang kamahau gilir-manggilir, tuntang jaton ije oloh je mahalaue.

¹¹Pungau tuntang tahatong akan melai hete, burong mangkong tuntang kak akan melai hete. TUHAN mawi petak te kacau tuntang buang sama kilau helo bara jete injapa.

¹²Jaton ije raja je marentah lewu te, tuntang uras kare pamimpie jari lilap.[44]

¹³Kare istanae tuntang kare lewue je badinding batu akan inumbo sahep baduhi tuntang rowut, tuntang ielai awi sarigala tuntang burong onta.

¹⁴Meto basiak akan hapa koae malayap manggau panginae; kare kambe hatatombah tuntang kamben alem[45] manggau ekae malayan kahekae.

¹⁵Intu eka te handipe tada manampa sarangae, mananteloh, maherem tuntang mahaga kare anake. Kare burong nasar mahin hapumpong dengan genep pasangae.

¹⁶Keleh gau tuntang basa hong Buku ain TUHAN: aloh ije mahin jaton bara kare taloh belom te je akan nihau atawa jaton pasangae. Awi puna kalote auh parentah TUHAN, tuntang Ie kabuat jari mamumpong ewen.

¹⁷TUHAN je mambagi petak danum te akan ewen tuntang genep bitie manarima bagin ayu-ayue. Ewen akan melai intu hete palus katatahie, tuntang petak te manjadi ain ewen gilir-manggilir.