Read Ngaju YESAYA 36 Bible Online

YESAYA 36 - Ngaju bible

YESAYA 36

¹Hong nyelo kaepat walas Hiskia raja Yuda marentah, kare lewu je hadinding batu inyarang tuntang impakalah awi Sanherib, raja Asur.

²Limbah te ie manyoho perwira gantong ayue haguet bara Lakhis akan Yerusalem mimbit are tantara uka balaku mangat raja Yuda manyarah. Ewen dumah intu lewu te tuntang melai intu tana je inyewut tana pinatu, tokep parit je eka danum mahasor bara talaga je hila hunjun.

³Balalu telo biti pagawai Hiskia dumah manyondau perwira Asur te. Telo pagawai te iete Elyakim anak Hilkia kapala rumah tangga istana, Sebna sekretaris negara, tuntang Yoah anak Asap, sekretaris istana.

⁴Perwira Asur te hamauh dengan ewen, “Keleh manyampai akan Hiskia auh raja Asur toh, ‘Mbuhen ikau mangkeme arepm abas?

⁵En ikau manyangka baya auh bewei je tau mangganti siasat tuntang kaabas tantara? Eweh je iandalm sampai ikau bahanyi malawan Asur?

⁶ Ikau puna maharap pandohop Misir, tapi jete sama kilau oloh je mahapan batang tingen akan sokahe; — kareh sokah te akan bapelek tuntang lengem kilau pajok duhi. Kalote ampin raja Misir dengan kakare oloh je harap ie.’ ”

⁷Limbah te perwira Asur te hamauh, “Atawa mikeh koam je ikau harap dengan TUHAN, Hatallam? Metoh Hiskia marentah uka Yuda tuntang Yerusalem baya sombayang intu baun mesbeh hong Yerusalem, en dia je inderep te mesbeh tuntang kare eka manyembah TUHAN kabuat?

⁸Toh aku huang aran raja Asur bahanyi bataroh je amon ikau inenga due koyan kongan kuda, batantu ikau dia aton oloh ayum je kare te je tau manongkange.

⁹Hapa malawan perwira Asur je paling randah mahin ikau dia patut. Tapi ikau magon maharap kea uka Misir tau manenga pandohop hapan kareta parang tuntang pasukan bakuda.

¹⁰Ikau manyangka ikei manyarang tuntang mampakalah lewum dia mahapan pandohop TUHAN? TUHAN kabuat je mayoho ikei manyarang tuntang mampahancor lewu toh.”

¹¹Palus koan Elyakim, Sebna tuntang Yoah dengan perwira Asur te, “Keleh hakotak basa Aram dengan ikei, ikei harati. Ela mahapan basa Ibrani tau kasenen rayat intu hunjun dinding lewu te.”

¹²Tombah perwira Asur te, “En akam tuntang rajam bewei aku inyoho raja Asur akan manyampai kakare taloh toh? Aku kea hakotak dengan rayat je mondok intu dinding te, basa ewen te kareh haya-hayak dengan keton akan kuman tai tuntang mihop kahit keton kabuat.”

¹³Limbah te perwira gantong te mendeng tuntang mangkariak huang basa Ibrani, “Hining taloh je insanan raja Asur,

¹⁴‘Ela maku inipu awi Hiskia! Ie dia olih manyalamat keton!

¹⁵Ela mahining auh kataue uka harap dengan TUHAN. Ela mangira TUHAN akan manyalamat keton atawa mangahana tantara Asur akan marabut lewun keton.

¹⁶Ela mahining auh Hiskia! Aku raja Asur balaku uka keton balua bara lewu tuntang manyarah. Kareh keton tau kuman bua anggor ain keton bara kabon keton kabuat. Keton akan mangkeme kamangat bua sikon bara batang sikon ain keton kabuat. Keton mihop bara talagan danum ain keton kabuat.

¹⁷Sampai keton iindah akan ije lewu je sama kilau lewun keton kabuat. Intu hete aton kabon anggor je mahasil anggor akan keton, tuntang kabon gandom je mahasil tepung akan panginan keton.

¹⁸Ela mahining auh Hiskia! Ie baya manipu keton awi koae TUHAN akan manyalamat keton. En puji dewa bangsa beken manyalamat lewue bara kuasang-Ku?

¹⁹Hong kueh kare dewan lewu Hamat tuntang Arpad? Hong kueh kare dewan Separwaim. En aton oloh je dumah manyalamat Samaria?

²⁰Dewa je kueh je puji maliwus lewue bara kuasang-Ku? Kueh tau TUHAN manyalamat Yerusalem!’ ”

²¹Mahining auh te oloh lewu Yerusalem dia tombah, awi raja Hiskia jari marentah uka ewen suni bewei.

²²Palus Elyakim, Sebna tuntang Yoah marabit pakaian ewen tanda kapehe atei, palus haguet mansanan akan raja taloh je ingotak awi perwira Asur te.