Read Ngaju YESAYA 37 Bible Online

YESAYA 37 - Ngaju bible

YESAYA 37

¹Metoh raja Hiskia mahining peteh bara telo biti oloh te, ie marabit pakaiae tuntang mahapan pakaian karong tanda kapehe atei, palus ie haguet akan human TUHAN.

²Limbah te ie manyoho Elyakim kapala istana, Sebna sekretaris negara tuntang kare imam je aton pangkate uka haguet manyondau Nabi Yesaya, anak Amos. Ewen kea hapakaian karong.

³Jetoh peteh Hiskia je inyampai ewen akan Yesaya, “Andau toh andau kapehe atei; itah ihukum tuntang inawah. Itah kilau oloh bawi je handak luas, tapi lepah kaabas.

⁴Raja Asur jari manyoho perwira gantong ayue uka manawah Hatalla je belom. Eweh tawae Hatalla jari mahining auh tawah te tuntang akan mahukum ewen je mangotak auh te! Awi te keleh balakudoa intu Hatalla tagal kare oloh ain itah je magon belom.”

⁵Limbah manarima peteh bara Raja Hiskia te,

⁶Yesaya manyoho kare sarohan te manyampai auh tombah kalotoh, “TUHAN hamauh, raja dia usah mikeh mahining auh kare jipen raja Asur te je TUHAN dia olih maliwus itah.

⁷TUHAN akan mawi raja Asur mahining ije barita je panting pana sampai ie buli akan lewue kabuat, tuntang intu hete ie akan impatei.”

⁸Perwira gantong ain oloh Asur mandino barita iete rajan ewen jari malihi Lakhis tuntang kanjerae parang malawan lewu Libna, dia kejau bara hete.

⁹Raja Asur jari manarima barita bara tantara Misir je imimpin awi Tirhaka bara Sudan metohe dumah handak manyarang ewen. Awi te raja Asur mangirim surat akan Raja Hiskia,

¹⁰raja Yuda. Kalotoh auh surat te, “Ela tatipu awi janjin Hatalla je iandalm te je ikau dia akan manyarah intu lengengku.

¹¹Ikau jari mahining iete genep lewu je inyarang kare raja Asur ihancor samasinde. Ela manyangka je ikau tau liwus.

¹²Metoh tato hiangku mampahancor lewu Gosan, Haran tuntang Resep, hayak mampatei kare oloh Eden je melai intu Telasar; jaton ije bara kare dewan ewen je tau manyalamat ewen.

¹³Hong kueh kare raja lewu Hamat, Arpad, Separwaim, Hena tuntang Iwa?”

¹⁴Hiskia manarima surat te bara kare sarohan tuntang mambasae. Limbah te ie haguet akan human TUHAN tuntang mambirang surat te intu taharep TUHAN.

¹⁵Palus ie balakudoa koae,

¹⁶ “TUHAN Je Jaton Tikas Kuasae, Hatallan Israel, je melai intu hunjun kerub,[47] ikau tunggal Hatalla je manguasa uras kare karajaan intu hunjun salepah petak. Ikau je manjapa langit tuntang petak.

¹⁷TUHAN, ite taloh je metohe buah ikei. Hining uras kare auh tawah Sanherib mawi Ikau, Hatalla je belom.

¹⁸Ikei uras katawan, TUHAN, je kare raja Asur jari mambinasa are bangsa tuntang mampahancor kare lewun kare bangsa te.

¹⁹Kare dewa ain ewen kea imapui tuntang impahancor. Awi kare dewa te samasinde dia aton kuasae. Ewen baya hampatong bara kayu tuntang batu tampan olon.

²⁰O TUHAN, Hatallan ikei, keleh paliwus ikei bara kare auh oloh Asur te, uka kare bangsa hong kalunen katawan je batunggal Ikau bewei TUHAN.”

²¹Limbah te Yesaya mangirim peteh akan Raja Hiskia kilau auh tombah akan lakudoan raja,

²²TUHAN hamauh, “Lewu Yerusalem manatawe tuntang halalea ikau, Sanherib!

²³En tawam eweh Ie je ihababaka awim tuntang inawahm te? Aku, Hatallan Israel, Hatalla je barasih.

²⁴Ikau manyoho saroham uka mangamburau je hapan kareta parang ayum je are te, ikau jari mampakalah kare bukit je pakagantonge intu Libanon. Ikau tara-tara je ikau jari maneweng kare batang cemarae je paling gantong tuntang paling bahalap, hayak manembus kare himba je pangkalabate.

²⁵Ikau kea tara-tara je ikau manguan kalin danum tuntang mihop danum intu kare lewun bangsa beken, tuntang je kare tantara ayum manijak-nandik Sungei Nil sampai teah.

²⁶En dia puji ikau mahining je kakare taloh te jari irencana-Ku bara horan? Tuntang toh Aku malalus jete. Aku toh je manenga akam kuasa uka mampahancor kare lewu hadinding batu jadi baduroh-baderep.

²⁷Kare oloh je melai intu hete uras nihau kaabase; ewen tarewen tuntang mikeh. Ewen sama kilau oru intu padang atawa oru je tumbo intu hunjun sapau je palus keang kamahau amon inampur awi riwut timor je balasut.

²⁸Tapi Aku katawan taloh handiai tahiu bitim. Aku katawan tahiu taloh je ilalusm tuntang akan kueh ikau haguet. Aku katawan je ikau sangit toto dengang-Ku.

²⁹Aku jari mahining tahiu kasangit tuntang kajohom te. Toh ingkepang-Ku kawit intu urongm tuntang bangus intu nyamam, uka ikau injijit-Ku buli mahalau jalan je ihoroim katika ikau dumah.”

³⁰Yesaya kea mangirim peteh toh akan Hiskia, “Jetoh auh je akan jadi tanda akam. Nyelo toh tuntang nyelo harian oloh akan kuman gandom je tumbo tuntang belom kabuate. Tapi limbah te ewen tau mimbul gandom tuntang anggor kabuat tuntang mangkeme hasile.

³¹Oloh Yuda je magon belom akan sanang mangat kilau taloh imbul je uhate handalem toto palus mamua.

³²Intu Yerusalem tuntang intu hunjun bukit Sion akan aton kare oloh je salamat, awi TUHAN Je Jaton Tikas Kuasae jari manukas iete taloh te akan manjadi.

³³Jetoh ie taloh je insanan TUHAN tahiu raja Asur: ‘Ie dia akan tame Yerusalem atawa mampalekas panah ayue akan lewu te. Kare tantara je mahapan talawang ije mahin jaton je tau manokep lewu te, tuntang intu hakalilinge aton inampa timbuk hapa mangalindonge.

³⁴Raja Asur akan buli mahalau jalan je ihoroie katika ie dumah, tuntang jaton tame lewu te. Aku, TUHAN, jari hakotak.

³⁵Lewu Yerusalem akan iilang-Ku tuntang ingalindong-Ku tagal hormat-Ku kabuat tuntang tagal njanjing-Ku dengan rewar-Ku Dawid.’ ”

³⁶Alem te kea malekat TUHAN dumah akan eka kare kemah Asur tuntang mampatei 185.000 biti tantarae. Hayak hanjewu andau ijee tinai kare hantun ewen te hakalampah.

³⁷Palus Sanherib, raja Asur, undur buli akan Niniwe.

³⁸Sinde andau katika ie sombayang intu human dewa Nisrokh, ie impatei hapan padang awi Adramelekh tuntang Sareser, kare anake. Limbah te ewen hadari akan Ararat. Palus Esarhadon, anak hatuee je beken, jadi raja mangganti ie.