Read Ngaju YESAYA 38 Bible Online

YESAYA 38 - Ngaju bible

YESAYA 38

¹Lakau katika te Hiskia haban tuntang karenga matei. Nabi Yesaya anak Amos, manalih ie tuntang hamauh, “TUHAN mameteh aku mampajadi kare gawi, awi raja dia tau keleh. Dia tahi tinai raja malihi kalunen.”

²Hiskia mules mambalik bitie akan hila dinding palus balakudoa,

³“TUHAN, keleh mingat je aku toh jari manempo intu Ikau dengan baketep tuntang katoton ateiku. Aku harajur handak malalus kahandak Ayum.” Palus Hiskia manangis paham.

⁴Limbah Yesaya haguet TUHAN manyoho ie tinai, koae,

⁵haluli talih Hiskia tuntang nyampai peteh toh, “Aku, TUHAN, Hatalla, je inyembah Dawid tato hiangm, jari mahining lakudoam tuntang mite danum matam. Aku akan mandahang umurm lime walas nyelo tinai.

⁶Ikau tuntang lewu Yerusalem akan iliwus-Ku bara raja Asur. Lewu toh akan tetep ingalindong awi-Ku.” Palus Yesaya manyoho oloh mahamis bua sikon tuntang mohose intu baluyong Hiskia sampai keleh. Raja Hiskia misek, “Narai tandae je TUHAN akan mampekeleh aku tuntang je aku tau haguet akan Human TUHAN tinai?”[48]

⁷Yesaya tombah, “Jetoh tanda je inenga TUHAN akan raja je Ie manggenep janjin Aie.

⁸Intu paninjok jam matanandau tampan Raja Ahas, TUHAN akan mawi kangkalingen jete undur sapuluh garis.” Palus kangkalingen te undur sapuluh garis.

⁹Limbah te Hiskia keleh, ie manyurat auh lagu tara kalotoh:

¹⁰“Koangku, harue satengah umur aku musti haguet, mampalepah tisan umurku intu lewun oloh matei.

¹¹Koangku, aku dia tinai mite TUHAN hong hunjun petak, atawa mite olon hong kalunen toh.

¹²Hambaruangku bageto, maka pambelomku hapus, sama kilau kemah sakatik je ingarak; sama kilau benang inetek bara pakakas panantang; inyewutku Hatalla mampahapus pambelomku.[49]

¹³Hapus alem aku mangkariak tagal kapehe, anga-angat kare tulangku ingaratup ije kongan singa; inyewutku Hatalla mampahapus pambelomku.[50]

¹⁴Auhku sasar korik tuntang balemo, kilau burong dara aku manarahing. Matangku heka awi mananggera akan langit, TUHAN, paliwus aku bara kasusah toh.

¹⁵Narai koangku? Jetoh gawin TUHAN; aku dia tau batiroh awi kapehe atei.

¹⁶O TUHAN, tenga akangku pambelom awi auh tuntang gawim, keleh aku belom akam bewei.[51]

¹⁷Kapehengku akan hobah jadi kasanang, Ikau manyalamat[52] aku bara bahaya; kare dosangku jari iampun lepah.

¹⁸Intu lewun oloh matei jaton oloh je manara aram, oloh matei dia olih maharap kaketepm.

¹⁹Baya oloh belom je manara aram, sama kilau je ilalusku andau toh. Oloh bakas manyarita akan anake lalehan kaketepm Ikau, o TUHAN.

²⁰TUHAN, Ikau jari mampakeleh aku, palus ikei manyanyi tara intu human Ayum sambil mampahiau kacapi, hapus pambelom ikei.”[53]