Read Ngaju YESAYA 39 Bible Online

YESAYA 39 - Ngaju bible

YESAYA 39

¹Lakau katika te, raja Babel, iete Marodakh Baladan anak Baladan, mahining je Raja Hiskia harun keleh bara kahabae. Palus ie manyoho oloh uka mimbit surat tuntang panenga akan Hiskia.

²Hiskia manambang kare sarohan te dengan sanang atei tuntang mamparahan akan ewen uras kare panataue, iete amas tuntang perak, rarampah tuntang minyak harum, tuntang salepah pakakas tantarae. Jaton ije taloh intu istana tuntang hapus karajaan ayue je dia imparahae akan ewen.

³Limbah te Nabi Yesaya manaharep Raja Hiskia tuntang misek, “Bara kueh kare oloh te? Narai koan ewen?” Hiskia tombah, “Ewen bara Babel, lewu je kejau.”

⁴“Ewen mite narai intu istana?” Pisek Yesaya tinai. “Urase”, tombah Hiskia. “Jaton ije ramo je iingkes hong istana je dia imparahangku akan ewen.”

⁵Palus Yesaya hamauh dengan raja, “TUHAN Je Jaton Tikas Kuasae hamauh,

⁶‘Akan sampai katikae uras kare panatau intu istanam toh, tuntang je jari imumpong tato hiangm sampai andau toh, iimbit akan Babel. Ije mahin jaton je akan impelai.

⁷ Bara kare anak esom aton je akan induan tuntang iawi pagawai istana uka manyang raja Babel.’ ”

⁸Raja Hiskia tombah, “Bahalap kea peteh TUHAN je inyampaim akangku.” Ie tombah kalote awi ie manirok: “Asal karajaangku tetep aman tuntang damai katahin aku belom.”