Read Ngaju YESAYA 40 Bible Online

YESAYA 40 - Ngaju bible

YESAYA 40

¹Kalotoh auh Hatallan keton, “Ampong, ampong ungkup-Ku!

²Keleh manyanang atei oloh Yerusalem, sanan je gawin oloh je mahajipen ewen jari hapus. Kasalan ewen jari iampun awi-Ku,[54] kare dosan ewen jari ihukum-Ku due kali lipet.”

³ Aton auh je mantehau, “Tatap jalan intu padang pasir akan TUHAN. Ngancang jalan hai intu padang akan Hatallan itah!

⁴Genep janah musti inimbok, bukit tuntang lungkoh imparata. Petak habukit akan jadi petak rampar, tuntang je lewak-lewau impalamos.

⁵Palus kahain TUHAN akan imparahan; hapus ungkup oloh kalunen akan manyaksie. Toto, TUHAN kabuat jari manjanjie!”

⁶ Aton auh je mansanan, “Keleh mambarita!” Aku misek, “Narai je musti imbaritaku?” “Keleh mambarita je olon te sama kilau oru, kilau kambang je hanjulo bewei kahalape.

⁷Oru palus keang tuntang kambang balayu, amon TUHAN mahimon riwut je balasut. Toto bangsa te sama kilau oru.

⁸Oru palus keang tuntang kambang akan balayu, tapi auh Hatallan itah tetep sampai katatahie.”

⁹Keleh mandai akan hunjun bukit je gantong tuntang sanan barita bahalap te akan Yerusalem! Keleh mantehau hapan hai auh, tuntang sanan barita bahalap akan Sion![55] Suman akan kare lewu Yuda iete Hatallan ewen akan dumah!

¹⁰ Ite, TUHAN, Hatalla dumah dengan kuasa uka malalus gawi dengan abas. Ie impahayak awi kare oloh je jari iliwus Awie.[56]

¹¹ Sama kilau ije biti sakatik je mahaga kawan meto Aie; Ie kabuat mamumpong ewen. Kare anak tabiri ientang Awie, hapan kajentan Aie Ie manantiring kare indu kawan tabiri.

¹²Eweh manakar tasik mahapan lokap lengee, atawa mukur langit mahapan gawang? Eweh manakar petak danum hapan kilo pikul atawa manimbang bukit tuntang lungkoh hapan dacing?

¹³ Eweh je mamimpin TUHAN, atawa majar Ie kilau panasehat Akae?

¹⁴Akan eweh TUHAN misek uka mandino pangatawan tuntang kaharati? Eweh mangagalan Ie uka gawie dia sala?

¹⁵Akan TUHAN, kare bangsa sama kilau ije kapantis danum hong timba, sama kilau ije tampitik kawo intu timbangan; kare pulau sama kahiae dengan kawo.

¹⁶Uras kare meto intu parak kayu Libanon dia sukup akan indu parapah je ingehu; kare batange lalau isut indu panduk apuie.

¹⁷Uras kare bangsa jaton rimae Akae, kilau jaka ewen te jaton bewei intu taharep Ie.

¹⁸ Jadi dengan eweh ikau handak manyama Hatalla? Tumon tirokm eweh je sama ampie Dengae?

¹⁹Ie dia sama kilau hampatong tampan kare tukang, hampatong je halapis amas tuntang hagalang perak.[57]

²⁰Oloh je dia olih mamili amas tuntang perak,[58] mintih kayu je dia purah rusak. Ie manggau tukang je ahli akan mawi hampatong je dia purah hongge.

²¹Dia badai ikau dia katawan tuntang dia mahining, tuntang dia insanan akam bara horan? Dia badai ikau dia kasene bara solake kilen ampie kalunen inampa?

²²Je manjapa jete mondok intu hunjun petak bunter, oloh lewue ampie korik sama kilau sangkalap. Ie mambirang langit kilau benang, tuntang mangkepae kilau kemah je akan eka melai.

²³Ie mawi kare panguasa tapondok, tuntang kare pamimpin nihau kuasae.

²⁴Ewen te kilau taloh imbul je mangor je harun lembut kare uhate. Amon TUHAN mahimon riwut, ewen keang tuntang inambalang kilau tampilai.

²⁵Eweh je itongm sama dengan Hatalla Ije Barasih Haliai? Dengan eweh ikau handak manyama Ie?

²⁶Tampayah langit tuntang nantuani! Eweh je manjapa kare bintang? Ie je mator ewen sama kilau pasukan, Ie katawan jumlah ewen samandiai, tuntang mantehau arae mije-mije. Jaton ije je tau nihau, amon dia awi kuasan Hatalla!

²⁷Jadi Israel, mbuhen ikau manarahing, sama kilau jaka TUHAN Hatallam dia katawan kare kasusahm? Kilau jaka Ie dia paraba kajarian ayum, tuntang dia manantuani hak ayum?

²⁸Lalehan ikau dia katawan tuntang dia mahining? TUHAN, Hatalla je katatahie, je manjapa hapus petak. Ie dia puji heka atawa uyuh; tirok Ayue dia olih itah mandugae.

²⁹Ie mampaabas oloh je heka, manenga semangat akan oloh je jaton kaabas.

³⁰Kare oloh tabela tau heka tuntang uyuh kare anak bujang tau tapaleko.

³¹Tapi oloh je maandal TUHAN, harajur mandino kaabas taheta. Ewen kilau burong nasar je tarawang gantong hapan kaabas palapase. Ewen hadari tuntang di tau heka, ewen mananjong tuntang dia tau uyuh.