Read Ngaju YESAYA 41 Bible Online

YESAYA 41 - Ngaju bible

YESAYA 41

¹Koan Hatalla, “Keleh suni tuntang hining auh-Ku, o oloh lewu je kejau. Keleh batatap uka dumah intu pengadilan, lius tuntang agah pakaram. Ayo itah basara haya-hayak, uka mamutus eweh je bujur, eweh je sala.

²Eweh je mirak panguasa bara timor,[59] tuntang manenga akae kamanang harajur? Eweh je mawi ie mampakalah kare bangsa, tuntang manguasa kare raja akae? Padange mawi ewen bahamburan sama kilau kawo, panahe mahambur ewen sama kilau tampilai inantawus riwut.

³Ie palus manggoang tuntang miar jaton taloh mahalange; paie balias, bilak dia manigong jalan.

⁴Eweh je malalus kakare taloh te? Eweh je manukas jalan sejarah? Aku, TUHAN, Aku je solake, tuntang tetep aton sampai kahapuse.

⁵Oloh bara kare lewu kejau mite taloh je jari iawi-Ku. Ewen tangkejet tuntang hagenjeh mikeh palus hapumpong haya-hayak tuntang dumah.

⁶Uras oloh sama hakadohop, tuntang hakarasan.

⁷Tukang kayu mangarasan atei tukang amas, tukang garinda manara tukang bakal. Koae, ‘Bahalap toto gawim’; palus impadehee hapan paku mangat dia hagolak.

⁸ Tapi ikau, Israel, rewar-Ku, ungkup je iintih-Ku, ikau turonan Abraham, sobat-Ku.

⁹Ikau jari induang-Ku bara kare saran petak, intehau-Ku bara kare eka je paling kejau. Koang-Ku, ‘Ikau rewar-Ku; Aku dia manolak oloh je iintih-Ku’.

¹⁰Ela mikeh awi Aku mampahayak ikau, ela meles, awi Aku Hatallam. Ikau akan indeheng-Ku tuntang indohop-Ku, ingagalang-Ku hapan lengeng-Ku je manang.

¹¹Item, uras oloh je sangit dengam, akan impakalah tuntang dahe-dahei. Kare oloh je malawan ikau, akan binasa tuntang lepah lingis.

¹²Ikau akan manggau kare oloh je malawan ikau, tapi ikau dia sondau ewen. Kare oloh je parang dengam metoh toh jari binasa tuntang nihau.

¹³Awi Aku, TUHAN, Hatallam mimbing lengem hila gantaum; koang-Ku, ‘Ela mikeh, Aku akan mandohop ikau.’ ”

¹⁴Koan TUHAN, “Ela mikeh, Israel, aloh ikau korik tuntang balemo. Aku toh TUHAN je mandohop ikau. Je Barasih Haliai, Hatallan Israel Ie te Panyalamat aim.

¹⁵Item, iawi-Ku ikau sama kilau papan hapa mihik, je taheta, banyihi tuntang bakasinga due kabaris. Ikau akan mihik kare bukit tuntang mampahancore; kare bukit iawim kilau bulun behas.

¹⁶Ikau akan manggiap ewen, palus ewen inarawang riwut tuntang ihambur riwut barat. Ikau akan hanjak awi Aku, TUHAN, tuntang tara-tara tagal Aku, Hatallan Israel.

¹⁷Amon bangsa ayung-Ku je asi-asi te manggau danum, tuntang balengkong ewen keang awi teah belai, palus Aku, TUHAN, akan tombah lakudoan ewen; Hatallan Israel dia akan malihi ungkup Ayue.

¹⁸Iawi-Ku kare sungei je mahasor intu kare bukit je gundul; tahasak danum akan manampusak intu bentok petak rampar. Padang pasir akan iawi-Ku talaga; danum akan mamancar bara petak je keang.

¹⁹Padang pasir akan iimbulku batang cemara, batang undus, kambang tanjong[60] tuntang batang akasia. Petak gundul akan iawi-Ku himba, padang agatis, uei tuntang cemara.

²⁰Palus oloh samandiai akan mitee tuntang mangatawan ie te Aku, TUHAN, je malalus jete. Ewen akan manampayah tuntang harati. Hatallan karasih Israel mawi taloh te manjadi.”

²¹TUHAN, rajan Israel, hamauh dengan kare dewa, “Imbit pakaram, sanan kare sababe!

²²Keleh dumah, tuntang tujum narai taloh je akan manjadi, uka ikei katawan kajariae kareh. Suman kare kajadian je bihin, narang rimae mangat ikei manantuan ie.

²³Sewut narai taloh je akan manjadi, mangat ikei katawan keton toto oloh je kasene hatalla. Lalus taloh je baguna atawa je mamparugi, mangat ikei hengan mitee.

²⁴Toto haliai keton tuntang gawin keton jaton rimae, tuntang kare oloh je manyembah keton te eka kajilek bewei.

²⁵Aku jari manyoho ije biti bara hila timor; intehau-Ku ie uka manyarang bara hila utara. Kare panguasa akan ihunje-nandike sama kilau petak kisak, sama kilau tukang balanai mahunje-manandik petak liat.

²⁶Eweh bara keton je jari manujum jete sampai ikei tau manoto auhe? Tapi marak keton jaton oloh je mansanan jete, jaton oloh je mahining auh keton hakotak.

²⁷Aku, TUHAN, je solake mambaritae akan Sion; Aku manyoho sarohan barita bahalap akan Yerusalem.

²⁸Katika aku manggaue marak kare dewa, jaton ije oloh je tau mansanan tanda, jaton ije oloh je tau tombah.

²⁹Toto, kare dewa te dia baguna, ewen baya hampatong je inoang tuntang jaton bara kaabas, hayak dia olih mawi taloh en-en.”