Read Ngaju YESAYA 42 Bible Online

YESAYA 42 - Ngaju bible

YESAYA 42

¹ Koan TUHAN, “Jetoh rewar-Ku je ingilak-Ku, oloh paintih-Ku je manyanang atei-Ku. Aku jari manenga kuasang-Ku akae, uka mawi kaadilan akan genep bangsa.

²Ie dia akan mangkariak atawa mantehau hapan hai auhe, auhe dia tarahining intu jalan.

³Humbang je nantahulei dia akan imeleke, sumbo je pini-pinit dia akan imbelepe. Dengan baketep ie akan mamparahan katoto,

⁴dia bembang atawa bageto kaharap, sampai kaadilan indehen intu hunjun petak. Kare lewu je kejau taharu dengan auh ajare.”

⁵ TUHAN, Hatalla manjapa tuntang mambirang langit; Ie manampa petak tuntang kakare taloh je lembut intu hunjue. Ie manenga tahaseng, pambelom tuntang hambaruan akan olon. Ie manyampai peteh toh akan reware,

⁶ “Aku, TUHAN, mantehau tuntang manyoho ikau uka malalus kaadilan. Ikau ingagalang-Ku tuntang ihaga-Ku mangat manjadi janji akan ungkup oloh kalunen, tuntang kalawa akan kakare bangsa.

⁷Mangat mamparenang matan oloh babute, tuntang maliwus oloh bara kakaput penjara.

⁸Aku toh TUHAN, jete arang-Ku; kahaing-Ku dia inenga-Ku akan eweh bewei; arang-Ku je basewut dia Aku manyarahe akan hampatong.

⁹Katika toh taloh je inujum-Ku jari manjadi; Aku handak mansanan taloh je taheta; helo bara jete manjadi; jari insanang-Ku akan keton.”

¹⁰Keleh manyanyi lagu taheta akan TUHAN, tara aran Aie, o hapus petak! Keleh mangguroh, o tasik[61] tuntang kakare taloh awang huange, kare lewu je kejau tuntang kakare oloh lewue!

¹¹Keleh kare padang pasir tuntang kare lewue manara aran TUHAN, keleh oloh lewu Kedar manara aran Aie! Keleh oloh lewu Sela basasurak, tuntang mantehau bara tantan bukit!

¹²Keleh ewen mampahai TUHAN, tuntang mampahai aran Aie hong kare lewu je kejau.

¹³TUHAN miar parang sama kilau ije biti pahlawan, sama kilau ije biti tantara paham rajin handak parang. Ie mambo auh lahap parang tuntang mamparahan kamanang Aie intu taharep musoh Aie.

¹⁴Hatalla hamauh, “Jari tahi Aku manyuni arep-Ku; Aku benyem tuntang manyarenen arep-Ku. Toh, sampai katikae uka bagawi, Aku handak mangkariak sama kilau oloh bawi je luas.

¹⁵Bukit tuntang lungkoh akan iawi-Ku gundul, uras kare batang kayue impalayu-Ku. Kare janah sungei iobah-Ku jadi padang pasir,[62] uras kare danau impateah-Ku.

¹⁶Bangsa aing-Ku je babute akan ingagalang-Ku mahoroi jalan je dia ewen katawae; ewen akan iimbit-Ku mahoroi kare jalan je dia ewen kasenee. Kakaput iawi-Ku manjadi kalawa akan ewen, tuntang jalan je lewak-lewau imparata-Ku. Jete taloh je akan ilalus-Ku akan ewen, tuntang pasti Aku akan malaluse.

¹⁷Oloh je percaya dengan hampatong dewa tuntang mangakue kilau hatallan ewen, akan inawah tuntang impahawen.”

¹⁸TUHAN hamauh, “Hining, o kare oloh badengen! Ite, o kare oloh babute!

¹⁹Eweh je labih babute bara Israel rewar-Ku? Eweh je labih badengen bara sarohang-Ku?

²⁰Israel, are taloh je gitam, tapi ikau dia manampayahe, pindingm habangah, tapi ikau dia manyeneh.”

²¹TUHAN handak manyalamat; Ie handak mangat parentah Ayue ihormat tuntang impahai.

²²Tapi bangsa te jari lepah irampok; ewen inahan huang kare kamar intu penda petak, tuntang ingurong huang kare penjara. Ewen intakan awi gawin rampok, tuntang jaton oloh je tau mandohop.

²³Eweh bara keton je maku mahining taloh toh, tuntang manantuanie harajur?

²⁴Eweh je manyarah Israel uka ie irampas? En dia jete TUHAN kabuat? Intu taharep Ie itah jari badosa, itah dia belom manumon parentah Ayue, tuntang dia omba auh ajar Aie.

²⁵Palus Ie mawi itah mangkeme angat kasangit Ayue je paham, tuntang kapehe awi parang je hai. Kasangit Aie mangehu intu Israel kilau apui, tapi itah dia kasene taloh te, tuntang dia bajar bara taloh je ingkeme itah.