Read Ngaju YESAYA 43 Bible Online

YESAYA 43 - Ngaju bible

YESAYA 43

¹O Israel, kalotoh auh TUHAN, “Aku toh je manjadian tuntang manampa ikau, ela mikeh, ikau pasti inyalamat-Ku! Aku jari mantehau ikau hapan aram, ikau toh oloh ayung-Ku.

²Amon ikau mangumbang danum, Aku akan mampahayak ikau, ikau dia akan leteng intu kare kapehem. Amon ikau manyuro apui, ikau dia akan bakehu, kare tingkes je babehat dia akan mancalaka ikau.

³Awi Aku TUHAN, Hatallam, Hatallan karasih Israel, Panyalamat aim. Misir inenga-Ku kilau akan tewusm, Sudan tuntang Seba kilau gantim.

⁴Ikau barega intu matang-Ku, Aku marega tuntang sinta ikau; palus inenga-Ku olon kilau gantim, kare bangsa kilau gantin hambaruam.

⁵Ela mikeh basa Aku mangalindong ikau. Bara barat tuntang bara timor inyoho-Ku anak esom dumah hapumpong.

⁶Aku marentah akan utara tuntang salatan, mangat ewen jeleng iliwus. Keleh kare anakm je hatue buli tinai bara eka kejau, tuntang kare anakm je bawi buli bara kare tapakan petak.

⁷Awi ewen handiai uras jari intehau hapan arang-Ku, ewen injapa awi-Ku uka mampahai arang-Ku.”

⁸Hatalla hamauh, “Soho ewen manaharep Aku bangsa ayung-Ku je babute, aloh ewen aton matae; ewen je badengen aloh aton pindinge.

⁹Soho uras kare bangsa hapumpong tuntang uras kare suku ingampeleng. Je kueh bara marak kare dewa ain ewen je jari mansanan taloh je manjadi katika toh? Eweh bara marak ewen je tau manujum tahiu taloh je wayah rahian? Keleh kare saksi ain ewen dumah, tuntang mambukti je ewen bujur, mangat uras kare oloh je mahining ewen hamauh, je puna toto kalote!

¹⁰O ungkup-Ku, keton kare saksi ayung-Ku, keton iintih-Ku jadi kare rewar-Ku mangat kasene Aku tuntang percaya dengang-Ku tuntang harati je Aku toh Hatalla. Aku Hatalla Ije Tunggal jaton je beken helo bara Aku tuntang limbah Aku.

¹¹Aku kabuat-Ku bewei je TUHAN, beken bara Aku jaton je tau manyalamat.

¹²Aku jari mansanae akan keton, Aku je manyalamat keton, tuntang dia ie hatallan oloh bangsa beken je aton marak keton; keton jadi saksi akang-Ku. Tuntang Aku, Aku toh Hatalla,

¹³sampai katatahie Aku tetep Hatalla. Jaton ije je tau liwus bara kuasang-Ku, atawa mahalang rencana ayung-Ku.”

¹⁴TUHAN Panyalamat keton, Je Barasih ain Israel, hamauh, “Tagal keton Aku mangirim tantara akan Babel, tuntang inelak-Ku kare huit bauntonggang penjara; auh surak oloh Kasdim iobah-Ku jadi tatum.

¹⁵Aku TUHAN, Hatallan keton je barasih, Rajam je manjapa ikau, O Israel!”

¹⁶TUHAN jari manampa ije jalan mahoroi tasik, mahoroi danum je hagalombang.

¹⁷Ie manyoho tantara tuntang kare perwirae parang, tuntang ewen miar hapan kareta bakuda. Tapi ewen manjato dia olih harikas tinai, ewen jari matei kilau hampulor je belep.

¹⁸TUHAN hamauh, “Jaton gunae mingat taloh je jari mahalau, ngahus bewei mingat taloh je jari manjadi.

¹⁹Keleh tampayah, Aku mawi taloh je taheta; metoh toh jari nampara en dia ikau mitee? Aku akan mawi jalan intu padang pasir, tuntang kare sungei intu padang himba.

²⁰Meto bariar akan mampahai arang-Ku; sarigala tuntang burong onta akan manara arang-Ku awi Aku mawi danum mahasor into padang pasir, tuntang kare sungei intu parak kayu akan mampihop ungkup paintih-Ku.

²¹Ewen te bangsa je inampa-Ku akang-Ku uka tau mambarita auh tara akang-Ku.”

²²TUHAN hamauh, “Tapi ikau Israel, dia manyembah Aku, tuntang dia tinai sombayang intu Aku.

²³Ikau dia mimbit tabiri akan parapah je ingehum, dia mahormat Aku hapan parapahm. Padahal Aku dia mambehat ikau hapan parapah, atawa manyusah ikau awi-Ku balaku manyan.

²⁴Ikau dia mamili garo harum akang-Ku dia mameda belai-Ku hapan enyak parapah je inyambalihm. Tapi ikau mambehat Aku mahapan kare dosam, Manyusah Aku mahapan kare kasalam.

²⁵Tapi Aku Hatalla je mampuas kare dosam, Aku mampun ikau awi puna tumon te ampin huang-Ku; Aku dia tantai mingat dosam.

²⁶Keleh mingat Aku, ayo itah akan eka pangadilan, imbit pakaram mangat tarang je ikau bujur.

²⁷Tato hiangm je solake[63] jari badosa, kare pamimpin jari mandarhaka malawan Aku,

²⁸kare imam ain keton jari mamapa[64] Humang-Ku. Palus Israel inyarah-Ku uka inawah, turonan Yakob inalua-Ku impalomos.”