Read Ngaju YESAYA 44 Bible Online

YESAYA 44 - Ngaju bible

YESAYA 44

¹TUHAN hamauh, “Hining, o Yakob rewar-Ku, o Israel, ungkup paintih-Ku!

²Aku TUHAN je manampa ikau, je manampa ikau bara kanain indum, tuntang je mandohop ikau. Ela mikeh, ikau rewar-Ku, ungkup paintih je inyinta-Ku.

³Awi Aku akan manusoh danum akan petak je keang, tuntang mawi kare sungei mahasor intu petak je batekang. Aku akan manenga kuasang-Ku akan turonam, tuntang mamberkat kare anak esom.

⁴Ewen akan belom bajewong sama kilau oru hong tokep danum, kilau batang parara saran batang danum.

⁵Mije-mije akan mangaku arepe ayung-Ku, tuntang dumah hinje dengan turonan Yakob. Gagenep bitin ewen manyurat intu lengee; Ayun TUHAN, tuntang manyewut arepe oloh ungkup ain Hatalla.”

⁶ Jetoh auh TUHAN Je Jaton Tikas Kuasae, Raja tuntang je mangalindong Israel, “Aku, Hatalla Ije Tunggal, je solake tuntang je kahapuse.

⁷Eweh je sama kilau Aku? Soho ie mangaku! Keleh ie mansanae tuntang mambuktie akang-Ku! Eweh jari manujum wayah je rahian bara tamparae sampai lawin jaman?[65]

⁸Bangsa ayung-Ku, ela mikeh atawa tarewen; en dia bara horan sampai toh Aku jari manujum taloh je manjadi? Keton akan saksi akang-Ku. Eka kalindong je beken jaton tuntang dia Aku kasenee.”

⁹Kare oloh je manampa hampatong dewa dia baguna, tuntang kare dewa je inara ewen te jaton rimae. Kare oloh je manyembah hampatong te oloh babute je dia katawan taloh en-en, awi te ewen akan impahawen.

¹⁰Hayang bewei oloh manampa hampatong toangan tuntang manyembahe kilau dewa!

¹¹Toto haliai, kare oloh je manyembah hampatong akan impahawen. Oloh je manampa hampatong te olon bewei. Soho ewen dumah haya-hayak; pasti ewen akan mikeh tuntang mahamen.

¹²Tukang sanaman manduan ije katetek sanaman palus manampae hapan apui tuntang manasale hapan tukul. Ie manguae hapan kaabas je aton intu ie. Metoh bagawi ie balau, teah belai, tuntang heka.

¹³Tukang kayu maukur kayu. Ie manggambar pangue hapan kapur, mamahate hapan kare pakakase tuntang mawie jadi hampatong olon je bungas, palus minae huang humae.

¹⁴Tau hirahe kayu je ihapae te bara batang kayu cemara, batang jati batu atawa jati biasa je inewenge intu parak kayu. Tau kea ie mimbul kayu alau palus mentai sampai ujan mawi jete tumbo.

¹⁵Belahe bara kayu te akan pandok apui hapa mangalasut arepe tuntang mamapui rote tuntang mamanggang isin meto, palus Ie besoh. Ie mangalasut arepe tuntang hamauh, “Lalehan kamangate hayak lasu-lasut! Apui toh puna paham mampangat!” Tisan kayu te ihapae mawi hampatong. Ie manyembahe tuntang balakudoa, “Ikau hatallang-Ku, keleh manyalamat Aku!”

¹⁸Toto humong kare oloh kalote! Ewen manutup mata tuntang atei ewen sampai dia harati taloh en-en.

¹⁹Tukang hampatong te dia sampai manirok, “Kayu toh belahe ingehu-Ku, tuntang buringe ihapa-Ku mamapui rote tuntang mamanggang isin meto. Palus tisan kayu te iawi-Ku hampatong. Jadi toh Aku manyembah ije kadereh kayu!”

²⁰Gawi te sama ih dengan kuman kawo. Oloh te impalayang awi tiroke je humong, sampai Ie dia olih indohop tinai. Ie dia olih mangaku ije hampatong je aton into lengee te tanjaro bewei.

²¹TUHAN hamauh, “Keleh mingat uras kare taloh toh, o Israel, awi ikau puna rewar-Ku, Aku manara ikau, tuntang ikau rewar-Ku, Israel, aku dia akan mangalapean ikau!

²²Kasalam iharak-Ku kilau baunandau, dosam indari-Ku kilau ambon. Keleh haluli talih Aku, awi Aku jari maliwus ikau!”

²³Keleh basasurak hanjak, o langit, keleh basasurak, o hila huang petak! Basasurak hanjak, o kare bukit! Kea parak kayu tuntang kare kayu awang huange! Awi TUHAN jari mamparahan kahain Aie awie manewus Israel ungkup Ayue.

²⁴Kalotoh koan TUHAN, Panyalamatm je manampa ikau bara kanain indum, “Aku TUHAN je manampa taloh samandiai, je kabua-buat mambirang langit, jaton je mandohop manampa petak.

²⁵ Aku toh je mambalang tujum tukang tujum, tuntang mureh kare tukang tenong. Kare auh oloh pintar-harati ilawang-Ku, ilmu ain ewen iawi-Ku kahumong.

²⁶Aku mandehen auh rewar-Ku, tuntang malalus rencana je insanan sarohang-Ku, Aku hakotak tahiu Yerusalem je akan ielai tinai, tuntang kare lewun Yuda akan imangun awi-Ku tinai; kare duroh-derepe akan ihalalian.

²⁷Aku wei je hamauh dengan labehon tasik: Keleh surut! Aku handak mampateah kare sungei.

²⁸ Aku wei je hamauh dengan Kores, ‘Ikau ih je marentah akang-Ku, tuntang malalus kare taloh je eka kahandak-Ku. Keleh marentah uka Yerusalem imangun tinai, tuntang Human TUHAN iandak galange.’ ”