Read Ngaju YESAYA 45 Bible Online

YESAYA 45 - Ngaju bible

YESAYA 45

¹TUHAN jari mintih Kores jadi raja; ie inunjok uka mampakalah kare bangsa tuntang uka mamelek kuasan kare raja. TUHAN akan mambuka kare lawang lewu akae, jaton ije je magon inutup. TUHAN hamauh dengae,

²“Aku akan manatap jalan akam; bukit tuntang lungkoh akan imparata-Ku, kare bauntonggang tambaga akan imusit-Ku, tuntang kare huit sanaman akan imelek-Ku.

³Palus Aku akan manenga akam, panatau panuhan je basilim, uka ikau katawan Aku TUHAN, Hatallan Israel, je jari mantehau ikau hapan aram.

⁴Aku mantehau ikau tuntang manenga akam galar, aloh ikau dia kasene Aku. Aku manyoho ikau mandohop Israel rewar-Ku, awi ewen bangsa paintih aing-Ku.

⁵Aku TUHAN, jaton beken, Aku Hatalla Ije Tunggal. Aku jari manenga akam pakakas parang, aloh ikau dia kasene Aku.

⁶Kakare taloh te ilalus-Ku uka bara hila timor akan hila barat kakare oloh katawan je Aku TUHAN, dia aton hatalla beken bara Aku.

⁷Aku toh je manampa kalawa tuntang kakaput, Aku mimbit berkat, tuntang calaka. Aku TUHAN je malalus taloh handiai te.

⁸Bara langit Aku mampamohon kamanang sama kilau ujan, petak mambangah arepe uka manarimae, palus mampalembut salamat tuntang kaliwus; Aku TUHAN je mawi taloh te manjadi.”

⁹ Calaka oloh je habantah dengan Hatalla Je manjapa ie; ie kilau kenceng je malawan oloh je manampa jete. En petak liat misek tukange, “Mawi en ikau toh?” En kenceng bakotok awi tukange jaton bara kaapik?

¹⁰Calaka oloh je hamauh dengan oloh bakase, “Mbuhen aku inakan kalotoh?”

¹¹TUHAN, Hatallan Israel je Barasih hamauh, “Keleh misek Aku tahiu kare taloh hong wayah je rahian. Tapi ela misek tahiu kare anak-Ku, atawa manyoho Aku mawi taloh en-en.

¹²Aku toh TUHAN je manampa petak, tuntang manjapa olon uka melai hete. Hapan kuasang-Ku Aku mambirang langit, tuntang marentah matanandau, bulan tuntang kare bintang.

¹³Aku toh je manggerek atei Kores uka malalus kahandak-Ku tuntang mandehen kaadilan. Aku akan mamparata kakare jalan je ihoroie. Ie akan mamangun haluli lewu aing-Ku Yerusalem, tuntang maliwus ungkup-Ku je inawan, dia mahapan sogok atawa imbayar.” TUHAN Je Jaton Tikas Kuasae jari hakotak.

¹⁴TUHAN hamauh dengan Israel, “Duan akam hasil tanah Misir tuntang kaontong ain Sudan. Kare oloh Seba je gagah jadi oloh ayum; ewen mananjong sambil imasong intu hila likutm Ewen kea sontop tuntang mangaku, ‘Hatalla toto intu bentok keton; jaton Hatalla beken bara Ie!

¹⁵Hatalla je manyalamat Israel iete Hatalla je manyahokan Arep.

¹⁶Kakare oloh je mawi hampatong dewa; uras akan impahawen tuntang inawah.

¹⁷Tapi Israel inyalamat TUHAN; salamat Ayue akan dehen. Keton dia akan impahawen, tuntang inawah palus katatahie.’ ”

¹⁸TUHAN te je manjapa langit, Ie te Hatalla! Ie je manjapa tuntang mangupeh petak, Ie mawi jete dehen tuntang tetep mendeng. Ie dia mawie akan eka melai je suni benyem, tapi toto-toto akan eka melai. Ie te je hamauh, “Aku toh TUHAN, tuntang jaton je beken.

¹⁹Aku dia hakotak benye-benyem, atawa huang eka je basahokan. Aku dia manyoho ungkup-Ku Israel manggau Aku hayang bewei. Aku TUHAN, mansanan taloh je toto, tuntang manyewut taloh je bujur-buah.”

²⁰TUHAN hamauh, “Keleh hapumpong tuntang dumah haya-hayak, uras keton je liwus bara kare bangsa! Puna humong kare oloh je maarak hapatong kayu, tuntang balakudoa intu dewa je dia olih manyalamat.

²¹Imbit pakaram; parahan kare buktie yoh, keleh ewen barunding sama arepe, Eweh je mangabar taloh te tuntang mansanae bara horan? En dia Aku, TUHAN? Jaton hatalla beken je beken bara Aku. Aku Hatalla je adil tuntang Panyalamat, jaton je beken baya Aku bewei!

²²O kakare oloh kalunen, keleh mules talih Aku mangat keton inyalamat, awi baya Aku bewei Hatalla, jaton hatalla je beken!

²³ Aku jari hajanji, tuntang janji aing-Ku dia akan balang; tagal Aku kabuat Aku sumpah: Genep oloh je mandeko utut intu taharep-Ku, tuntang hong basa ayue kabuat hajanji uka baketep dengang-Ku.

²⁴Kare oloh akan manyewut, ‘Kaadilan tuntang kaabas baya bara TUHAN!’ Kakare oloh je basingi dengang-Ku akan manalih Aku tuntang impahawen.

²⁵Tapi turonan Yakob akan inyalamat tuntang ewen akan manara Aku TUHAN.