Read Ngaju YESAYA 46 Bible Online

YESAYA 46 - Ngaju bible

YESAYA 46

¹Jetoh kajarian kare dewa Babel; horan, hampatong dewa Bel tuntang Nebo inyembah oloh, tapi wayah toh imuat akan hunjun likut meto, sampai manjadi taloh eton je babehat akan meto je heka.

²Kare hampatong te dia olih mandohop oloh je metoe, awi ewen kabuat iimbit kilau tawanan. Kalote ampin kajarian ewen.

³Hining auh-Ku, o turonan Yakob, uras kare keton je batisa bara ungkup-Ku. Aku jari mahaga keton bara keton inakan.

⁴Aku tetep Hatallan keton sampai keton bakas; tuntang tetep manjaga keton sampai keton huwan. Aku manampa keton tuntang tetep mahaga keton, Aku akan mandohop tuntang manyalamat keton.

⁵Dengan eweh keton handak mananding Aku? En aton je tau inyama dengang-Ku?

⁶Oloh mukei epok tuntang manusoh amase, palus manimbang perake dengan dacing. Ie mupah tukang amas mangat mawi hampatong dewa, palus ie manyembah hampatong tampan ayue te.

⁷Hampatong te imaku tuntang iandak intu ekae, ie mendeng intu hete tuntang dia tau bindah. Amon oloh balakudoa intu ie, ie dia tombah, tuntang dia manyalamat oloh te bara kasusahe.

⁸Keleh ingat tuntang manimbang, o oloh darhaka!

⁹Ingat kare taloh je manjadi intu jaman horan; keleh ngaku je Aku Hatalla, tuntang jaton taloh je beken, Aku Hatalla, tuntang jaton ije je sama kilau Aku.

¹⁰Bara solake insanang-Ku kare taloh hong andau rahian, bara horan Aku manujum taloh je akan manjadi. Koang-Ku: Taloh je imutus-Ku akan ilalus, kahandak-Ku pasti inggenep-Ku!

¹¹Aku mantehau ije biti oloh panguasa bara timor[66] ie dumah kilau ije kongan burong basiak uka malalus auh putusan ayung-Ku. Taloh je insanang-Ku pasti akan ilalus-Ku, taloh je irencanaku pasti akan iawi-Ku.

¹²Hining auh-Ku, o kare oloh balecak, keton je baya manirok kamanang magon kejau.

¹³Aku akan manokep andau kaliwus, salamat je inenga-Ku dia landar tinai. Aku akan manyalamat Yerusalem, tuntang manenga hormat akan Israel.”