Read Ngaju YESAYA 47 Bible Online

YESAYA 47 - Ngaju bible

YESAYA 47

¹ TUHAN hamauh, “O Babel, mohon bara padadusam, tuntang mondok intu hunjun kawo. Ikau dia mampahanjak tuntang dia manis sama kilau bihin.

²Keleh tempe tepong hapan batu; engkak sandurongm, nggatang saloim sampai gitan buntism, tuntang lius dimpah sungei.[67]

³Oloh akan mite ikau halowai, inawah tuntang impahawen. Aku akan mamaleh ikau, tuntang jaton ije je iliwus-Ku.”

⁴Hatalla je barasih ain Israel maliwus itah, aran Aie TUHAN Je Jaton Tikas Kuasae.

⁵TUHAN hamauh dengan Babel, “Suni, tuntang tame akan kakaput. Ikau dia tinai inyewut ‘Ratu kare karajaan.’

⁶Bihin Aku sangit dengan ungkup-Ku, ewen dia tinai ianggap-Ku ayung-Ku. Palus ewen inyarah-Ku akam, tuntang ikau dia masi ewen, kare oloh bakas mahin paham ingapehe awim.

⁷Ikau manirok akan manjadi ratu katatahie, tuntang dia harati atawa manirok kajariae.

⁸ Tagal te hining auh-Ku, o ikau je rajin manggoang kasanang! Ikau manyangka pambelom ayum sanang, tuntang jaton ije je kilau ikau. Ikau mangira ikau dia akan jadi balo, tuntang turonam dia akan binasa.

⁹Tapi hanjolo ih, hong ije andau, due taloh te hayak manjadi. Aloh ikau mahapan kaji tuntang karohei, banam tuntang anakm akan intakis kea.

¹⁰Ikau mangkeme sanang huang kapapam, ikau madoe gawim te dia inantuani. Ikau impalayang awi kapintar tuntang kaharatim, ikau mnyangka jaton ije je sama kilau ikau.

¹¹Tapi ikau akan buah calaka, kajim dia olih mahilae. Ikau akan intakan calaka tuntang dia olih manangkise. Kabinasa akan dumah manantekas, tuntang ikau dia manyangka helo bara te.

¹²Keleh kete-ketep dengan kakare karohei tuntang kajim, je manderoh ikau bara katabelam. Eweh tawae jete baguna akam, hapa mampikeh musohm.

¹³Ikau heka awi lalau are nasehat. Soho kare panujum dumah, manyalamat ikau; ewen je jari manaliti kare serok langit tuntang mangatawan kare bintang, tuntang hong genep bulan taheta manujum narai[68] je akan jadi kajariam.

¹⁴Item, ewen sama kilau tampilai je kinan apui; dia olih ewen manyalamat arepe! Nyalan apui te tangkalau balasut akan ewen, jete dia lasut apui hapa mandadah arep.

¹⁵Jete gunan kare panujum akam je manderoh ikau bara kakorikm; genep bitie haguet malihi ikau; jaton ije je dumah uka mandohop ikau.”