Read Ngaju YESAYA 48 Bible Online

YESAYA 48 - Ngaju bible

YESAYA 48

¹Hining, o turonan Yakob, turonan Yuda je mahapan aran Israel, koam ikau mangaku Hatallan Israel, tuntang sumpah mahapan aran TUHAN. Tapi kare auhm te dia toto.

²Aloh kalote ikau dengan kahanjak je ikau oloh bara lewu barasih; tuntang je ikau basinggoh intu Hatallan Israel, je inyewut TUHAN Je Jaton Tikas Kuasae.

³TUHAN hamauh, “Hining, o Israel! Taloh je manjadi bihin, jari tahi insanang-Ku, taloh je inyewut-Ku, manyalenga Aku malaluse; tuntang iawi-Ku gitan ampie.

⁴Aku katawan je ikau batekang atei, badungil tuntang hatakolok batu.

⁵Bara bihin Aku jari manujum; helo bara manjadi, jari insanangku, uka ikau ela hamauh, je jete gawin kare hampatong dewam.

⁶Uras kare tujumku je ihiningm jari manjadi; ikau musti mangaku je auh-Ku te toto. Toh aku mansanan kare taloh je taheta, kare rahasia je hindai ikau katawae.

⁷Harue toh Aku manampae, dia bihin; hindai puji ikau mahining tahiu taloh te, uka ikau dia tau hamauh, je ikau mangatawan urase.

⁸Aku katawan je ikau dia olih imercaya, bara bihin basewut kilau oloh darhaka. Awi te ikau dia katawae, dia ije kabawak kotak sampai akan pindingm.

⁹Aku manyarenan kasangit-Ku uka akang-Ku imbarita. Aku manahae akam, mangat ikau dia imbinasa.

¹⁰Aku mauji ikau hong apui kapehe, kilau perak imparasih huang tungku.

¹¹Jete ilalus-Ku tagal arep-Ku kabuat, basa Aku dia manalua arang-Ku imapa; kahaing-Ku dia imbagi dengan eweh bewei.”

¹² TUHAN hamauh, “Hining o Israel, ungkup je intehau-Ku, Aku toh tetep Hatallam. Aku ije solake, tuntang Aku kea je kalepahe.

¹³Lengeng-Ku mandak galang petak tuntang mambirang tutup langit. Amon aku mantehau arae, ewen bagulong dumah.

¹⁴Keleh keton samandiai hapumpong tuntang hining! Intu marak kare dewa jaton ije je manujum tahiu oloh paintih-Ku akan manyarang Babel; ie akan malalus taloh je eka kanahuang-Ku.

¹⁵Aku je mansanae tuntang mantehauie, je mangagalan ie sampai bahasil.

¹⁶Kantoh tokep Aku tuntang hining, bara bihin Aku hakotak tara-tarang; tuntang auh-Ku harajur iawi-Ku sampai manjadi.” Toh TUHAN Hatalla manyoho aku tuntang manenga akangku kuasan Ayue kabuat.

¹⁷Koan Hatalla je barasih ain Israel, Panyalamatm, “Aku TUHAN, Hatallam, je majar taloh je baguna akam, tuntang mangagalan ikau intu jalan je musti ihoroim.

¹⁸Jaka ikau manantuani kareparentah-Ku, maka kasanang kamangatm sama kilau sungei je dia puji teah; tuntang kaontongm sama kilau galombang hong tasik je dia puji tende.

¹⁹turonam akan manjadi sama kilau kare baras; Aku mangalindong ewen dia akan imbinasa.”

²⁰ Lius hadari bara Babel, ngabar auh barita toh akan hete-hete. Mbarita hapan surak kahanjak: “TUHAN jari manyalamat Israel reware!

²¹Katika Ie mangagalan ewen mahalau padang je keang, ewen dia teah belai. TUHAN manyila bukit batu tuntang mampahasor danum, bara huang batu Ie mampahasor danum akan ewen.

²² Dia aton salamat akan oloh papa.” Kalote auh TUHAN.