Read Ngaju YESAYA 49 Bible Online

YESAYA 49 - Ngaju bible

YESAYA 49

¹ Hining auhku, o lewu je kejau seneh kare auhku. TUHAN mantehau aku helo bara aku inakan, Ie mintih aku bara kanain induku.

² Ie mawi kare auhku sama kilau kanyihin padang, hapan lengen Aie kabuat[69] Ie mangalindong aku. Ie manampa aku sama kilau anak panah je buah asa, tuntang manameae akan huang telep, mangat tatap tau ihapan.

³Ie hamauh dengangku, “Ikau rewar-Ku; Aku akan impahai tagal ikau.”

⁴Tapi aku hamauh, “Kahekaku hayang; aku mampalepah kaabasku hayang bewei!” Tapi aku percaya TUHAN mandohop aku. Hatalla mambaleh akangku tumon gawingku.

⁵Helo bara aku inakan, TUHAN mantehau aku uka manjadi rewar Ayue, uka mamumpong ungkup Israel. Mangat ewen haluli talih Ie. TUHAN mawi aku ihormat, Hatalla jete kaabas-Ku.

⁶ TUHAN hamauh dengangku, “Gawi je labih hai mentai ikau, o rewar-Ku; ikau dia baya malian turonan Yakob tuntang halalian kahain kare suku Israel, tapi iawi-Ku ikau manjadi kalawan kare bangsa uka hapus kalunen inyalamat.”

⁷Hatalla je barasih Panyalamat Israel hamauh, dengan oloh je paham hina tuntang je inyingi awi kare bangsa hayak jadi rewar kare panguasa. “Kare raja akan mite gawing-Ku; ewen akan harikas mahormat Aku. Kare panguasa akan mitee kea, palus sontop manyembah.” Jete manjadi tulus awi TUHAN jari mintih rewar Ayue; Hatalla je barasih ain Israel baketep dengan janjin Aie.

⁸ TUHAN hamauh dengan ungkup Ayue, “Hong katika Aku mangilak, Aku akan tombah; intu andau Aku manyalamat, Aku mandohop keton. Ikau ingalindong-Ku tuntang injaga-Ku, tuntang iawi-Ku ikau jadi tanda janji akan kare bangsa. Aku mahalalian lewu je tunis benyem jadi tanah warisan eka melai.

⁹Oloh je huang penjara inyoho-Ku balua; je aton intu eka kaput imbit-Ku akan kalawa. Intu bukit je keang kamahau mahin ewen jaton tapas taloh en-en, hong hapus jalan aton panginan.

¹⁰ Ewen dia akan teah belai atawa balau, tuntang dia akan awi lasut andau intu padang pasir. Awi Aku, manyayang ewen, akan mangagalan ewen, tuntang magah ewen akan kare tahasak danum.

¹¹Aku akan mawi jalan mahalau kare bukit, uras kare jalan hai aing-Ku akan imparata-Ku.

¹²Bara kejau ungkup-Ku dumah-dumaha, bara hila utara, hila barat tuntang Sinim[70] intu hila salatan.”

¹³Keleh manyanyi o langit, keleh basasurak o petak, o kare bukit, keleh basasurak hanjak! Awi TUHAN dumah mampong ungkup Ayue, Ie sinta ungkup Ayue je kapehe.

¹⁴Tapi oloh lewu Yerusalem hamauh, “TUHAN jari malihi itah, TUHAN itah jari mangalapean itah.”

¹⁵TUHAN tombah, koae, “En tau ije biti indu mangalepan anake tuntang dia manyayang anak je inakae? Aloh ie tau mangalapean anake tapi Aku dia akan mangalepean ikau!

¹⁶Yerusalem, Aku harajur mingat ikau; aram imintik-Ku intu lukap lengeng-Ku.

¹⁷Kare oloh je mamangun ikau bajeleng dumah, tuntang je jari mangarak ikau akan haguet.

¹⁸Ite tuntang tampayah hakalilingm, rayatm jari hapumpong tuntang manalih ikau. Tagal Aku, Hatalla je belom, Aku hamauh, toto, ikau akan hanjak awi oloh lewum, kilau panganten bawi hanjak awi ie imbungas.

¹⁹Lewum je keang kamahau tuntang tunis benyem, toh jari tangkalau seke akan kare oloh je handak melaie. Tuntang kare oloh je handak mambinasa ikau, jari haguet kejau bara ikau.

²⁰Kare anak je inakan hong eka tawanan akan hamauh dengam, ‘Lewu toh lalau seke akangku, tenga eka akangku mangat aku tau melai intu hetoh.’

²¹Maka ikau akan hamauh huang ateim, ‘Eweh je manak kare anak te akangku? En dia aku jari nihau kare anakku, tuntang dia tau manak tinai? Aku iimbit akan eka tawanan tuntang ingejau hayak ilihi kabua-buat. Jadi bara kueh kare anak te, tuntang eweh je mambelom ewen?’ ”

²²TUHAN Je Pangkahai hamauh dengan ungkup Ayue, “Aku kareh manenga tanda akan kare bangsa tuntang ewen akan malian buli tinai kare anakm; kare anakm je hatue akan ingkipit, tuntang kare anakm je bawi akan iumah.

²³Kare raja akan sama kilau bapa akam, tuntang kare ratu sama kilau indum. Ewen akan sontop mahormat ikau tuntang mamparandah arepe dengam. Palus ikau akan katawan je Aku TUHAN; oloh je harap dengang-Ku dia impahawen.”

²⁴Ikau misek, En tau taloh rampas induan bara lengen pahlawan, atawa oloh tawanan inyintak bara lengen oloh tulas?”

²⁵TUHAN tombah, “Jete taloh je akan manjadi. Oloh tawanan ain kare pahlawan akan irabut haluli. Taloh rampas ain oloh je tulas akan induan tinai. Awi Aku kabuat je malawan musohm; Aku akan manyalamat kare anakm.

²⁶Aku akan mawi musohm babusau daha, sampai ewen hapuno sama arepe. Palus hapus oloh kalunen akan katawan, je Aku, TUHAN, Panyalamat aim; Je Pangkaabase, Hatallan Yakob, Panewus aim.”