Read Ngaju YESAYA 5 Bible Online

YESAYA 5 - Ngaju bible

YESAYA 5

¹ Hining auh nyanyingku tahiu kabon anggor sobatku. Ain sobatku aton kabon anggor intu saran bukit je basiwoh.

²Ie manyangkul petake tuntang manganan kare batue. Ie mimbul anggor je eka karajie Ie mamangun candi eka jaga. Ie mangali ije lowang eka mahamis anggore, palus ie mentai buae masak, tapi hasile bua anggor je masem.

³Jadi toh sobat-Ku hamauh, “Keton kakare oloh lewu Yerusalem tuntang Yuda, keleh mahakim Aku dengan kabon anggor-Ku.

⁴Narai tinai je musti iawi-Ku, je hindai Aku malaluse akan kabon anggor-Ku te? Mbuhen bua masem je ihasile, tuntang dia bua bahalap kilau je iharap-Ku?

⁵Kalotoh kare taloh je iawi-Ku akan kabon anggor te: Karambang je mangalilinge akan injawut-Ku, dinding je mangalindonge akan impalongkang-Ku, palus inalua-Ku meto basiak marusak tuntang mahunjee.

⁶Aku akan manaluae inumbo awi taloh imbul je baliar. Batang anggor te dia akan inggunting-Ku, tuntang dia akan irasih-Ku. Inalua-Ku haream inyangkulep awi rowut, haduhi tuntang oru, kare baunandau mahin ingahana-Ku mampamohon ujan akae.”

⁷Awi kabon anggor TUHAN Je Jaton Tikas Kuasae te iete Israel, tuntang Yuda, jete batang anggor je iimbule. Bara ewen iharap Awie kaadilan, tapi baya aton katulas. Ie maharap ewen mahaga kabujur, tapi baya aton kariak balaku kabujur kaadilan.

⁸Calaka keton je mamili kare huma tuntang marampas kare tana hapa manambah panatau keton! Dia tahi hindai lepah eka akan oloh beken tuntang baya keton bewei je melai intu lewu te.

⁹Aku mahining auh TUHAN Je Jaton Tikas Kuasae sumpah, “Kare huma je hai tuntang bahalap toh urase akan buang tuntang jaton oloe.

¹⁰Hasil petak akan gagal, kabon anggor je kahaie sapuluh hektar baya mahasil sapuluh liter danum anggor. Saratus liter binyi baya mahasil sapuluh liter gandom.”

¹¹Calaka keton! Bara hanjewu sampai hamalem gawin keton baya mihop taloh ihop bahari tuntang mawi kabusau.

¹²Hong kare pestan keton aton auh kacapi, gambus, tarabang tuntang suling tuntang danum anggor akan indu ihop. Tapi keton dia paduli dengan gawin TUHAN.

¹³Tagal te ungkup-Ku dia katawan taloh en-en akan imbit haguet jadi tawanan. Kare pamimpin tuntang rayat akan matei balau tuntang teah belaie.

¹⁴Nyaman pampatei habangah hai handak manelen kare oloh hai intu Yerusalem dengan rayat je rami-rami pesta.

¹⁵Genep bitin oloh akan impahawen, tuntang oloh je bajoho akan imparandah.

¹⁶Tapi TUHAN Je Jaton Tikas Kuasae mamparahan kahain Aie awi Ie malalus taloh je bujur. Ie akan mamparahan karasihe awie mahakim bangsa Ayue.

¹⁷Intu lewu je jari baduroh, anak kambing tuntang tabiri akan kuman oru tuntang dia tapas panginan.[6]

¹⁸Calaka keton je mawi dosa harajur!

¹⁹Koan keton, “Keleh TUHAN, Hatallan Israel je barasih jeleng mamutus! Keleh Ie malalus rencanae, uka itah mitee tuntang katawan.”

²⁰Calaka keton je manambalik takoloke akan parae taloh je bahalap manjadi taloh je papa, je kaput tuntang je balawa, je bapait manjadi je manis!

²¹Calaka keton je manyangka arep pintar harati tuntang paham pintar!

²²Calaka keton je rajang mihop anggor! Keton oloh bahanyi tuntang tamam amon keton musti manyampur taloh ihop je bahari!

²³Tapi baya akan mandino duit sogok, keton mambebas oloh sala, mangahana oloh je dia sala mandino kaadilan.

²⁴Keton jari manolak auh ajar ain TUHAN Je Jaton Tikas Kuasae, tuntang manawah parentah Hatallan Israel je barasih. Awi te sama kilau tampilai tuntang oru keang lepah bakehu huang apui, kalote kea kare uhat keton akan maram, kare kambang keton keang tuntang lepah inarawang riwut.

²⁵TUHAN sangit dengan bangsa Ayue, Ie jari tatap handak mahukum ewen. Kare bukit akan hongge; kare hantu hakalampah kilau rotik intu kare jalan. Tapi TUHAN magon sangit tuntang tetep akan mahukum.

²⁶TUHAN akan mantehau bangsa je kejau[7] tuntang ewen akan dumah bajeleng!

²⁷Ewen harajur tatap parang tuntang dia kasene kaheka. Ewen dia puji batiroh atawa taparuntok.

²⁸Isin panah ewen batajim tuntang tatap akan mamanah. Silon kudae sama kilau katekang batu apui, tuntang rodan karetae hundi cinik kilau pusok kanyawong.

²⁹Kare tantara mangaruntong kilau singa je musti manangkarap taloh kinae, palus iimbite hadari, tuntang jaton je tau maliwuse.

³⁰Intu andau te tarahining auh lahap oloh parang kilau auh letus tasik. Ite, hapus lewu te kaput tuntang kontep kaseke huang. Kalawa jadi kaput pijem.