Read Ngaju YESAYA 51 Bible Online

YESAYA 51 - Ngaju bible

YESAYA 51

¹TUHAN hamauh: “Hining auh-Ku, o keton je handak inyalamat tuntang je manalih Aku balaku pandohop. Ingat bukit batu asal keton imbintik, tuntang kalin batu asal keton ingali.

²Ingat tato-hiang keton Abraham tuntang Sarah je manak keton; katika Aku mantehau Abraham, ie jaton bara anak; palus imberkat-Ku ie tuntang inenga-Ku akae turonan je are.

³Yerusalem, Aku akan mampong ikau, tuntang uras kare oloh je melai intu awan duroh derep lewum. Kare eka padang pasir lewum je keang kamahau iawi-Ku jadi kabon, sama kilau Eden, kabon aing-Ku je bajewong. Intu hete oloh akan hanjak rantang tuntang manarima kasih mahapan kare auh nyanyi.

⁴Seneh auh-Ku, o bangsa ayung-Ku, hining kare kotak-Ku, o ungkup-Ku. Aku manenga auh ajar-Ku akan kare bangsa, kare hukum-Ku akan hapa mampalawa ewen.

⁵Salamat je inenga-Ku jari tokep; katika kamanang aing-Ku tokep sampai. Aku kabuat akan marentah kare bangsa. Kare lewu je kejau mentai Aku tuntang maharap gawing-Ku je tamam.

⁶Keleh mite langit tuntang tampayah petak; langit akan lilap kilau asep tuntang petak akan usang kilau kupit baju, uras kare oloh lewue akan matei sama kilau nyamok. Tapi salamat je bara Aku tetep sampai katatahie, tuntang kamanang ayung-Ku dia akan hapus.

⁷Hining auh-Ku, o bangsa ayung-Ku, ikau katawan taloh je bujur; auh ajar-Ku aton hong ateim. Ela mikeh amon ikau ihalalea awi olon, ela korik atei amon ikau ihina awi ewen.

⁸Ewen akan binasa tuntang lilap, kilau pakaian kinan gagat tuntang benang bara bulun tabiri je kinan awi gagat. Tapi salamat je inenga-Ku tetep sampai katatahie, kamanang aing-Ku palus gilir-manggilir.”

⁹Harikas o TUHAN, dohop ikei, nyalamat ikei hapan kuasan Aim. Keleh misik kilau jaman horan katika ikau mamparamok Rahab[71] tuntang mamuno naga tasik te sampai matei.

¹⁰Ikau kea je mampateah tasik, danum tasik je handalem. Ikau manampa jalan mahalau danum te, uka oloh je inyalamat tau dimpah.

¹¹Palus kare oloh je iliwus TUHAN akan buli ewen tame Yerusalem sambil basasurak ampin baun ewen hasangkowong awi kahanjak je katatahie. Ewen hanjak rantang, kapehen atei tuntang kakotok jari mahalau.

¹²TUHAN hamauh, “Aku toh je jari mampong ikau. Mbuhen ikau mikeh dengan olon je akan matei, dengan olon je inganan sama kilau oru?

¹³Lalehan ikau kalapean dengan TUHAN je manjapa ikau, je mambirang langit tuntang mandak galang petak? Mbuhen hapus andau ikau hagenjeh dengan amok oloh je mahenyek ikau tuntang je tatap mampalomos ikau? Toto haliai, amok ewen te dia tambelan dengam.

¹⁴Kare oloh tawanan akan bajeleng iliwus; ewen dia akan tapas panginan, tuntang dia akan matei tuntang ingubur.

¹⁵Awi Aku TUHAN, Hatallam, je mangurah tasik sampai galombange letu-letus. Je Jaton Tikas Kuasae jete arang-Ku.

¹⁶Aku je mambirang[72] langit tuntang mandak kare galang petak. Aku hamauh dengan Sion: Ikau toh ungkup aing-Ku; Aku manenga auh ajar-Ku akam tuntang mangalindong ikau hapan kuasang-Ku.”

¹⁷ Keleh misik, o Yerusalem, keleh misik! Hukuman je bara TUHAN awi kasangit Aie jari inanggongm sampai lepah.

¹⁸Bara kare oloh lewum jaton ije je mangagalan ikau, bara kare oloh ayum jaton ije je magah ikau.

¹⁹Ikau intakan awi due macam calaka; ganan gawi parang lewum binasa tuntang rayatm matei balau. Jaton oloh je masi tuntang mampong ikau.

²⁰Intu genep tapakan jalan kare oloh ayum balongkang awi lepah kaabas sama kilau bajang je buah jala. Ewen intakan awi kasangit TUHAN, tuntang buah lait Hatallan keton!

²¹Hining o kare oloh je ingapehe, je ruyong-rayang sama kilau oloh babusau!

²²Kalotoh auh TUHAN ayum, TUHAN, Hatallam, je mandohop ikau, “Kapehe je inenga-Ku huang kasangit-Ku, akan induang-Ku tinai bara ikau. Kasangit-Ku akan terai, tuntang ikau dia usah tinai mananggonge.

²³Kapehe te inenga-Ku akan oloh je mangapehe ikau, je puji manyoho ikau menter intu petak, tuntang mahunje-manandik ikau, kilau gawin oloh je mahoroi jalan.”